ABŞ-ın Buffalo Universitetinin alimləri maraqlı nəticəyə gəliblər: 63 yaşdan yuxarı qadınlarda əl sıxma gücü və əzələ dözümlülüyü nə qədər yüksəkdirsə, erkən ölüm riski bir o qədər aşağıdır. Tədqiqatın nəticələri JAMA Network Open jurnalında dərc olunub.
Araşdırmada 63–99 yaş arası təxminən 5 min qadın iştirak edib. Alimlər iki əsas göstəricini ölçüblər: əl sıxma gücü və “kreslodan beş dəfə qalxma” testi. Daha sonra iştirakçılar 8 il ərzində izlənilib.
Nəticələr göstərib ki:
-
Əl sıxma gücünün hər 7 kq artımı erkən ölüm riskini orta hesabla 12% azaldır.
-
Kreslodan qalxma sürəti yaxşılaşdıqca ölüm riski 4% azalır.
Ən maraqlısı odur ki, bu əlaqə fiziki aktivlik səviyyəsindən, ürək-damar vəziyyətindən və hətta bədən çəkisindən asılı olmayaraq qorunub saxlanıb. Yəni əzələ gücü özü ayrıca bir uzunömürlülük faktoru kimi çıxış edir.
Hətta həftədə 150 dəqiqəlik aerobik aktivlik tövsiyələrinə əməl etməyən qadınlarda belə güclü əzələlər daha aşağı ölüm riski ilə əlaqəli olub.
Alimlər vurğulayırlar ki, əzələləri gücləndirmək üçün mütləq idman zalına getmək şərt deyil. Öz bədən çəkisi ilə məşqlər, yüngül qantellər, trenajorlar və ya hətta məişət əşyaları kifayət edə bilər. Sadə güc məşqlərini gündəlik həyata daxil etmək yaşlı dövrdə sağlam qalmağın real strategiyasıdır.
