Milli Hidrometeorologiya Xidmətindən verilən məlumata görə, iyunun 18-də Bakıda və Abşeron yarımadasında hava şəraitinin əsasən günəşli və yağmursuz keçəcəyi gözlənilir.
Gecə saatlarında havanın temperaturu təxminən 20-22 dərəcə, gündüz isə 30-31 dərəcə isti olacaq. Gün ərzində havanın əsasən açıq, axşam saatlarında isə az buludlu olacağı proqnozlaşdırılır.
Azərbaycanın rayonlarında isə bəzi yerlərdə hava şəraitinin qeyri-sabit keçəcəyi gözlənilir. Xüsusilə dağlıq və dağətəyi rayonlarda fasilələrlə yağış yağacağı, şimşək çaxacağı, ayrı-ayrı yerlərdə isə qısamüddətli intensiv yağıntı və dolu olacağı ehtimal edilir.
Yağıntılı hava şəraiti ilə əlaqədar bəzi dağ çaylarında sululuğun artacağı, qısamüddətli daşqın və sel keçəcəyi istisna olunmur.
Bundan başqa, iyunun 17-18-də bəzi bölgələrdə küləkli hava şəraiti ilə bağlı sarı xəbərdarlıq verilib. Tovuz, Gəncə, Mingəçevir, Qazax, Ağstafa, Daşkəsən, Gədəbəy, Goranboy, Kəlbəcər, Naftalan, Sabirabad, Salyan, Şirvan, Qobustan, Neftçala və Naxçıvan MR-də qərb küləyinin sürətinin 13.9-20.7 m/s-ə çatacağı gözlənilir.
