ABŞ prezidentinin xüsusi nümayəndəsi Stiven Uitkoff Vaşinqtonla Tehran arasında aparılan danışıqların gedişini şərh edib. O, Fox News-a müsahibəsində bildirib ki, ABŞ üçün əsas “qırmızı xətt” İranın uran zənginləşdirməsindən imtina etməsidir.
Uitkoffun sözlərinə görə, Donald Tramp ona və Cared Kuşnerə konkret göstərişlər verib.
“Prezident Donald Tramp mənə və Cared Kuşnerə tapşırıq verib: qırmızı xətlər – zənginləşdirmə yoxdur, bütün material çıxarılmalıdır”, — deyə o bildirib.
Xüsusi nümayəndə vurğulayıb ki, Tehran yaxın vaxtda nüvə bombası yaratmaq imkanına malik ola bilər və ABŞ bunun qarşısını almaqda qərarlıdır. Eyni zamanda, onun sözlərinə görə, İran geri çəkilmir və mövqeyini qoruyur.
