ABŞ Prezidenti Donald Tramp baş prokuror Pem Bondinin vəzifədən azad edilməsindən sonra kabinetində genişmiqyaslı kadr dəyişikliklərini nəzərdən keçirir. Bu barədə Reuters agentliyi məlumat yayıb.
Ağ Evdəki mənbələrin sözlərinə görə, buna səbəb İranla müharibənin siyasi nəticələri, o cümlədən reytinqlərin aşağı düşməsi və seçicilər arasında narazılığın artmasıdır.
Məlumata görə, Ağ Evdə “böyük və dramatik yenilənmə” yox, daha çox “məqsədli kadr axını” gözlənilir. İşdən çıxarıla biləcək şəxslər arasında milli kəşfiyyat direktoru Tulsi Qabbard və ticarət naziri Hovard Lutnik də var. Bununla yanaşı, rəsmi açıqlamalarda prezidentin komandaya “tam etibar etdiyi” bildirilir.
Mənbələr qeyd edir ki, Tramp ictimaiyyətin və medianın müharibəyə reaksiyasından narazıdır, onun son xalqa müraciəti isə amerikalıları sakitləşdirə bilməyib.
“Seçicilər ideoloji mesajlara dözə bilər, amma yanacaq qiymətlərini dərhal hiss edirlər”, — deyə Ağ Ev rəsmilərindən biri bildirib.
Qeyd olunur ki, yekun qərar hələ verilməyib. Prezident komandasında kəskin “təmizləmə”dən çox, mərhələli dəyişikliklərə üstünlük verilir. Yeni qərarların ABŞ-da aralıq seçkilərdən əvvəl açıqlana biləcəyi istisna edilmir.
Digər ehtimal olunan istefalar arasında ABŞ ordusunun naziri Den Driskoll, FBI direktoru Keş Patel və əmək naziri Lori Çaves-DeRemerin də adı çəkilir.
Ağ Evdə kadr müzakirələrinin aktivləşməsi İranla müharibədən sonra prezidentə dəstəyin azalması ilə əlaqələndirilir.
