Yaroslavl vilayətində hüquq-mühafizə orqanları 20 il əvvəl baş vermiş körpə qətlində ananın təqsirini sübut edib.
Bu barədə Regional İstintaq Komitəsinin (Sledkom) mətbuat xidməti Telegram kanalında məlumat yayıb.
Məlumata görə, 61 yaşlı qadın köməksiz vəziyyətdə olan şəxsi qətlə yetirmə maddəsi ilə təqsirli bilinib. İstintaq və məhkəmənin müəyyən etdiyi kimi, hadisə 2002-ci ilin iyununda Tutaev şəhərində baş verib. Alkoqollu vəziyyətdə olan qadın bir aylıq oğlunun uzunmüddətli ağlamasına əsəbiləşərək onu pəncərədən küçəyə atıb. Körpə hadisə yerində həyatını itirib.
İş üzrə bütün hallar yalnız 2025-ci ildə müəyyən edilib. Bu, istintaqçılar və DİN-in əməliyyat əməkdaşlarının birgə işi nəticəsində mümkün olub.
“İstintaq və prosessual hərəkətlər, əməliyyat-axtarış tədbirləri, eləcə də ekspertiza araşdırmalarından ibarət kompleks həyata keçirilib”, — deyə qurumdan bildirilib.
Cinayət işi məhkəməyə göndərilib və məhkəmə qadını 10 il müddətinə azadlıqdan məhrum edib. Cəza ümumi rejimli islah koloniyasında çəkiləcək.
Hazırda hökm qanuni qüvvəyə minməyib.
