Politico Fransanın sabiq prezidenti Nikola Sarkozinin yeni kitabından parçalar dərc edib. Xatirələrində o, həbsxanada keçirdiyi 20 günü bütün detalları ilə təsvir edib.
Sarkozi bu dövrü “Həbsxana gündəliyi” adlandırdığı kitabda qələmə alıb. Əsər 216 səhifədən ibarətdir — yəni həbsdə keçirdiyi hər günə təxminən 11 səhifə düşür. Giriş hissəsində o yazır:
“Qeyd etmək istəyirəm ki, bu, roman deyil.”
Buna cavab olaraq Politico redaksiyası istehzayla qeyd edir ki, bu cümlə “kitabın maraqlı süjetə malik olması ilə bağlı son ümidləri də puç edir — çünki söhbət iki mühafizəçinin qonşu kamerada olduğu, üç həftədən az çəkən həbsxana həyatından gedir”.
“Atmosfer hədələyici idi. Cəhənnəmə xoş gəlmisiniz!” — Sarkozi yazır.
O, saxlanma şəraitini **“ucuz otel”**lə müqayisə edir və həbsdə qalmağın onun üçün demək olar ki, dözülməz olduğunu bildirir. Əvvəlcə pəncərəni açmağa çalışıb, lakin Paris küçələrindən gələn səs-küyə görə bundan peşman olub. Daha sonra kamerasındakı digər məhbus dəmirə bənzər bir əşya ilə barmaqlıqları döyməyə, ardınca isə “Şir Kral” cizgi filminin musiqisini durmadan zümzümə etməyə başlayıb.
Sarkozi xüsusilə yataqdan şikayət edib. Onun sözlərinə görə, ordu xidmətində belə bu qədər sərt döşəkdə yatmayıb. Yastıqları “plastikə bənzər qəribə materialdan”, yorğanları isə “sadəcə ad xatirinə” adlandırıb. Buna baxmayaraq, ilk gecə yatmağı bacarıb — baxmayaraq ki, qonşularının islamçı terrorçular, təcavüzkarlar, qatillər və narkotik alverçiləri ola biləcəyini bilirmiş.
“Möhtəşəm perspektiv!” — deyə o, istehza ilə yazır.
Daha pis vəziyyət isə yeməklə bağlı olub. Nahar çox erkən — saat 11:30-da verilir, yeməklər isə “iştaha açmayan” olurmuş. Sarkozi yazır ki, yeməklərin qoxusundan ürəyi bulanırmış, bir dəfə isə ona tamamilə yumşalmış baget təqdim edilib.
Həbsxana məişəti onu xüsusilə sarsıdıb. Gündəlik idmanla məşğul olmağa icazə verilsə də, duş qəbul etmək əsl problemə çevrilib. Su birbaşa divardan, nazik axınla gəlir və “taymer kimi qəfil dayanırmış”, buna görə də düyməni davamlı basmaq lazım olurmuş.
Bütün çətinliklərə baxmayaraq, Sarkozi xüsusi imtiyazlardan imtina etdiyini yazır. Onun sözlərinə görə, Fransa prezidenti Emmanuel Makron onu daha təhlükəsiz həbsxanaya köçürməyi təklif edib, lakin Sarkozi bunu qəbul etməyib. Bununla belə, iki mühafizəçinin qonşu kamerada qalması istisna təşkil edib.
Xatırladaq ki, sabiq Fransa prezidenti “cinayətkar birlikdə iştirak” ittihamı ilə həbs olunmuşdu. İstintaqa görə, o, 2007-ci ildə keçmiş Liviya lideri Muəmmər Qəddafidən gələn vəsaitlərin yaxın çevrəsi vasitəsilə qəbul edilməsinə şərait yaradıb. Sarkozi Fransa tarixində həbsxanaya düşən ilk sabiq prezident olub.
20 gün həbsdə qaldıqdan sonra, məhkəmə onun apellyasiyasını təmin edib və hazırda Nikola Sarkozi azadlıqdadır.
