Bəzən insan müəyyən bir şəxslə görüşdükdən sonra özünü izaholunmaz şəkildə yorğun, əsəbi və enerjisiz hiss edir. Psixologiyada belə insanlara qeyri-rəsmi şəkildə “enerji vampiri” deyilir. Bu anlayış mistik deyil, daha çox başqalarının emosional resurslarından istifadə edən davranış modelini ifadə edir.
Belə insanlar tez-tez şikayət edir, daim problemlərdən danışır və ətrafdakıların diqqətini öz üzərinə çəkməyə çalışır. Onlarla ünsiyyətdən sonra insan motivasiya və enerjisini itirmiş kimi hiss edə bilər.
Enerji vampirlərinin digər əlamətlərindən biri daimi neqativlik və tənqiddir. Onlar tez-tez başqalarının uğurlarını kiçildir, müsbət mövzuları belə mənfi istiqamətə yönəldir və emosional gərginlik yaradırlar. Bəzi hallarda isə manipulyasiya və günah hissi yaratmaqla qarşı tərəfi öz təsiri altında saxlayırlar.
Psixoloqlar qeyd edir ki, belə insanlarla ünsiyyətdə emosional sərhədlər qoymaq vacibdir. Əgər bu cür insanlardan tam uzaqlaşmaq mümkün deyilsə, bəzi qaydalara əməl etmək tövsiyə olunur.
Mütəxəssislərin tövsiyələri:
• Sərhəd qoymaqdan çəkinməyin – sizi istifadə edən insanlara qarşı “yox” deməkdən qorxmayın.
• Özünüzü günahkar hiss etməyin – ünsiyyəti azaltmaq qərarı toksik münasibətlərdən qorunmaq üçün şüurlu seçimdir.
• Emosiyalarınızı nəzarətdə saxlayın – belə insanlar çox vaxt mübahisə və emosional reaksiyalardan qidalanırlar, buna görə də mümkün qədər sakit və neytral reaksiya vermək daha düzgündür.
• Mübahisəyə girməyin – çox vaxt belə insanlarla konstruktiv dialoq mümkün olmur və müzakirə yalnız gərginliyi artırır.
• Enerjinizi boş yerə sərf etməyin – onları dəyişməyə və ya fikirlərini dəyişdirməyə çalışmaq çox vaxt nəticəsiz olur.
• Özünüzü birinci yerə qoyun – belə insanlarla ünsiyyətdən sonra özünüzü yaxşı hiss etdirəcək fəaliyyətlərlə məşğul olun, sevdiyiniz insanlarla görüşün və ya sizi sevindirən bir iş görün.
Psixoloqların fikrincə, emosional sağlamlığı qorumağın ən vacib yolu şəxsi sərhədləri qorumaq və öz enerjinizi düzgün yönləndirməkdir.
