Rusiyalı rejissor Nikita Mixalkov Kinematoqrafiya Sənəti Akademiyasının məzunlarına diplomların təqdim olunması mərasimində müasir rejissorlar arasında peşəkarlıq çatışmazlığından danışıb.
Bu barədə “Kultura” qəzeti yazıb.
Mixalkovun fikrincə, kino sənayesində “aciz” rejissorların sayı çoxalıb. Buna görə də onun rəhbərlik etdiyi təhsil müəssisəsinin əsas vəzifələrindən biri aktyorları savadlı rəhbərlik olmadığı şəraitdə də peşəkar işləməyə hazırlamaqdır.
“Bizim prinsipimiz aktyora rejissor aciz olanda da işləməyi öyrətməkdir. Bu gün belə rejissorlar çoxdur”, — deyə Mixalkov bildirib.
Rusiyanın xalq artisti qeyd edib ki, Akademiyanın tələbələri geniş humanitar bilik bazası əldə edirlər. İxtisas üzrə ustad dərsləri ilə yanaşı, tədris prosesinə teatr tamaşalarına, sərgilərə, tarixi malikanələrə səfərlər, “Mosfilm”ə ekskursiyalar və qastrol fəaliyyəti də daxildir.
Rejissor vurğulayıb ki, aktyorların dünyagörüşünün genişləndirilməsi onların müxtəlif mədəni kontekstləri mənimsəməsi üçün vacibdir.
Mixalkovun sözlərinə görə, Akademiyada tədris Stanislavski, Mixail Çexov, Şarl Düllen və Piter Brukun metodlarının sintezi əsasında qurulub. Onun fikrincə, bu yanaşma məzunlarla qarşılıqlı anlaşma yaratmağa və müəllimlə tələbənin eyni peşəkar dildə danışdığı vahid mühit formalaşdırmağa imkan verir.
