Azərbaycan Bu Ölkəyə Elektrik Avadanlıqlardan İbarət Humanitar Yardım GÖNDƏRİB-VİDEO

Azərbaycan Respublikasından Ukraynaya növbəti humanitar yardım göndərilib. Elektrik avadanlıqlarından ibarət yük Sumqayıt Texnologiyalar Parkının ərazisindən yola salınıb.
 
Məlum olduğu kimi, bu məqsədlə, Azərbaycan Respublikasının Prezidenti cənab İlham Əliyevin 5 fevral 2025-ci il tarixli Sərəncamına əsasən, bir milyon ABŞ dollarının manat ekvivalentində vəsait ayrılıb.
 
Bu vəsait çərçivəsində göndərilən ilkin humanitar yardım yükünə elektrik kabelləri, naqillər və transformatorlar daxildir. Ukrayna tərəfindən daxil olmuş müraciətə əsasən, qeyd edilən təchizat müharibədən zərər çəkmiş ərazilərin elektrik enerjisi ilə dayanıqlı təchizatının bərpası üçün nəzərdə tutulur.
 
Ukrayna Azərbaycana və şəxsən ölkə Prezidenti İlham Əliyevə növbəti humanitar yardım partiyasına görə dərin minnətdarlığını bildirir. Bu dəstək Ukrayna xalqı və ölkə iqtisadiyyatının fəaliyyəti üçün həyati əhəmiyyət kəsb edir.
 
Bunu jurnalistlərə Ukrayna səfirliyinin iqtisadi məsələlər üzrə müşaviri Oleq Klınçenko bildirib. Humanitar yardım partiyası Sumqayıtdan Ukrayna səfirlik əməkdaşlarının iştirakı ilə həyata keçirilib. "Bu yardım həqiqətən Ukrayna xalqını, insan həyatlarını xilas edir və iqtisadiyyatımızın fəaliyyətini təmin edir. Bir müddət əvvəl Davos forumunda prezidentlər Volodimir Zelenski və İlham Əliyev görüşdülər. Bu görüş bizim strateji tərəfdaşlığımıza zəmanət verən növbəti hadisə, əlaqələrimizin möhkəm təmələ malik olduğunun göstəricisi oldu", - o bildirib.
O.Klınçenkonun sözlərinə görə, yeni yardım partiyasının göndərilməsinin Ukrayna ilə Azərbaycan arasında diplomatik münasibətlərin qurulmasının 33-cü ildönümünün qeyd olunduğu tarixə təsadüf etməsi əlamətdardır.
"Regional sabitliyin, sülhün və ticarət əməkdaşlığının təmin edilməsi, inkişafı və zəmanəti üzrə məqsədlərimiz var. Aramızda ticarətin daha mürəkkəb, daha kompleks hala gəlməsini görməkdən məmnunuq ki, bu da həm Azərbaycan, həm də bizim üçün faydalıdır", - o əlavə edib.
 
Xatırladaq ki, mövcud vəziyyətlə əlaqədar Azərbaycan tərəfindən Ukraynaya göstərilmiş yenidənqurma və humanitar məqsədli yardımların ümumi məbləği 40 milyon ABŞ dollarını keçib. 2025-ci ilədək elektrik avadanlıqları qismində 120-yə yaxın transformator və komplekt transformator məntəqəsi, 70-ə yaxın generator, habelə 3.3 milyon metrdən çox kabel və naqil Ukraynaya yola salınıb.