İtaliyanın baş naziri Corcia Meloni bazar günü gecəsi Milanda baş verən iğtişaşların təşkilatçılarını sərt tənqid edib. Bu barədə Reuters məlumat yayıb.
Meloni bildirib ki, aksiyada iğtişaş törədənlər Olimpiya Oyunlarına qarşı nümayişkaranə çıxış edərək bu görüntülərin dünya telekanallarında yayımlanmasını hədəfləyiblər və bu səbəbdən onlar “İtaliyanın və italyanların düşmənləridir”.
Baş nazir həmçinin dəmir yolu infrastrukturuna aid kabellərin zədələndiyini, bunun da qatarların hərəkətində fasilələrə yol açdığını qeyd edib.
International Olympic Committee (IOC) də etirazçıların hərəkətlərindən narazılıq ifadə edib. IOC nümayəndəsi Mark Adams vurğulayıb ki, dinc etirazlar qanunidir, lakin zorakılıq yolverilməzdir:
“Zorakılığın Olimpiya Oyunlarında yeri yoxdur.”
Şənbə günü dəmir yolunda baş verən insidentlər səbəbilə qatarların hərəkətində nasazlıqlar qeydə alınmış, hakimiyyət təxribat ehtimalını istisna etməmişdi.
Avropa KİV-lərinin qiymətləndirməsinə görə, Milanda keçirilən etirazlarda təxminən 10 min nəfər iştirak edib. Etirazçılar mənzil qiymətlərinin artımına qarşı çıxıb, həmçinin Olimpiadanın ətraf mühitə təsirlərindən narahatlıqlarını dilə gətiriblər.
Bazar günü gecə saatlarında isə təxminən 100 nəfərlik qrup iğtişaşlar törədib: pirotexnika və tüstü qumbaraları yandırılıb, polislərə şüşələr atılıb.
