Ermənistan Avropa İttifaqına daxil olarsa, öz milli kimliyini itirəcək.
Bunu Rusiya Dövlət Dumasının sədri Vyaçeslav Volodin “Vesti”yə müsahibəsində bildirib.
Siyasətçi qeyd edib ki, Aİ Ermənistana iqtisadi artım vəd edir. Onun sözlərinə görə, vaxtilə Ukraynaya da eyni vədlər verilmişdi. Lakin Ukrayna məhsulları Avropa bazarlarına buraxılmadı, çünki onlar “rəqabətədavamlı deyil” hesab olundu.
“Bəs Ermənistan nə satacaq? Onlar şərabı bizə satırlar. Makron gəldi, Paşinyanla qucaqlaşdılar, yaxşı, müqavilə bağlayın, şərabı Fransaya tədarük edin. Yox, hətta konyak da artıq onlarda brendidir, çünki fransızlar dedilər: sizdə bu, brendidir. Onlar öz kimliklərini Ukraynada itirdikləri kimi itirəcəklər”, deyə Volodin bildirib.
Eyni zamanda, o vurğulayıb ki, Ermənistan xalqını “hakim elita”dan ayırmaq lazımdır. Volodinin fikrincə, məhz həmin siyasi rəhbərlik ölkəni “uçuruma aparır”.
Duma sədri həmçinin qeyd edib ki, Rusiya həm Ermənistana, həm də erməni xalqına yardım edir. Bununla belə, Moskva münasibətlərdə “yalan və ikili standartlara” qarşıdır.
“Biz yalnız dürüst, açıq münasibətlərin və əlbəttə, qarşılıqlı faydalı əməkdaşlığın tərəfdarıyıq. Dostluq ikitərəfli hərəkəti olan küçədir”, deyə Vyaçeslav Volodin yekunlaşdırıb.
