Sumqayıtda Novruz bayramı ilə əlaqədar olaraq möhtəşəm ümumşəhər şənliyi təşkil edilib-VİDEO

Sumqayıtda möhtəşəm Novruz şənliyi təşkil edilib.

Tədbirdə Sumqayıt şəhər İcra Hakimiyyətinin başçısı Zakir Fərəcov, rayonun hüquq mühafisə orqanlarının rəhbərləri, şəhid ailələri, qazilər, və şəhər ictimayətinin nümayəndələri iştirak ediblər.“Kimyaçı” Mədəniyyət Sarayının qarşısındakı meydanda təşkil edilən xalqımızın milli-mənəvi irsini, bolluğu, bərəkəti və xeyirxahlığı təcəssüm etdirən Novruz bayramı şənliyi izləyicilərin marağına səbəb olub.

Den.az  xəbər verir ki, şəhər rəhbərliyinin də qatıldığı tədbirdə bayram tonqalı yandırılıb.

Bayram tədbirində Dədə Qorqud və Bahar qızı xeyir-dua verərək, Novruz bayramının xalqımıza uğur, bol ruzi-bərəkət gətirməsini arzulayıb, milli geyimli uşaqlar meydanda rəqs ediblər. Novruzun personajları olan Kosa və Keçəlin iştirakı ilə qədim xalq rəqsləri və oyunlar mərasim iştirakçıları tərəfindən maraqla qarşılanıb.

Tədbir iştirakçıları xalqımızın əsrlər boyu qoruyub-saxladığı milli-mənəvi dəyərləri özündə əks etdirən səhnələrə, qədim el-elat görüntülərinə, milli geyimlərimizin, mətbəximizin, xalq yaradıcılığının və sənətkarlığının ən gözəl nümunələrinə tamaşa ediblər.

Qeyd edək ki, Novruz bayramı milli-mənəvi dəyərlərin təcəssümüdür. Əsrlərin sınağından çıxmış, mənəvi dəyərlərimizi, adət-ənənələrimizi özündə yaşadan Novruz bayramı insanlar arasında birliyin və mehribanlığın möhkəmləndirilməsi, onların bir-birinə mərhəmət və diqqət göstərməsi kimi sağlam bir təməl yaratmışdır.Novruz bayramı sağlamlığın, firavanlığın başlanğıcıdır. Tarixi çox qədim olan Novruz bayramı hər il xalqımız tərəfindən böyük təntənə və coşqu ilə qeyd olunur.Bildirilib ki, milli-mənəvi dəyərlərimizi özündə əks etdirən Novruz bayramının tarixi çox qədim dövrlərə bağlıdır. Bu bayram tək ölkəmizdə deyil, bütün türk dünyasında da geniş şəkildə qeyd edilir. Novruz adətləri bir irs olaraq qorunub, saxlanılır və gələcək nəsillərə ötürülür.

Sonda konsert proqramı təşkil olunub.