"Denaz.tv" çəkdi göstərdi, vətəndaşların problemi həllini tapdı -VİDEO

Sürətlə inkişaf edən və abadlaşan Sumqayıtın ümumi arxitekturasına xələl gətirən qanunsuz küçə ticarətinə qarşı mütəmadi olaraq mübarizə aparılır.  Qanunla müəyyən olunan yerlərdən kənarda, piyada şəkillərinin üzərində qurulan bu cür obyektlər şəhərin görüntüsünü pozmaqla yanaşı, həm də insanların rahat hərəkətinə maneə yaradır. Odur ki, belə pərakəndə satış obyektlərinin coxalması və küçə ticarətinin tüğyan etməsi sakinlər tərəfindən narazılıqla qarşılanır.
 
Çoxsaylı şikayətləri nəzərə alan Sumqayıt şəhər icra Hakimiyyəti tərəfindən küçə ticarətinə və öz marağını güdən, görülən işlərə kölgə salmağa çalışan "işbaz"lara qarşı qanunamüvafiq tədbirlər görülür.
 
Belə tədbirlərdən biri də Sumqayıtın mərkəzi bazarı ətrafındakı mərkəzi küçələrdə pərakəndə şəkildə fəaliyyət göstərən "işbaz"lara qarşı görülüb. Şəhərin mərkəzi və insan izdihamı çox olan hissəsində quraşdırılan, Sumqayıtın ümumi arxitekturasını pozan, insanların gediş-gəlişinə əngəl yaradan qanunsuz obyekt sökülərək ərazidən götürülüb.
 
Qeyd edək ki, obyektin götürülməsindən sonra ortaya çıxan mənzərə heç də ürəkaçan olmayıb. Ətrafa obyekt sahibi tərəfindən atılan və nəticədə antisanitar vəziyyət, eləcə də pis qoxu yaradan  məişət tullantıları təmizlənib. Məlumat üçün bildirək ki, şəhərin gozəlləşməsinə və sakinlərin rahatlığına xidmət edən bu cür tədbirlərin davam etdirilməsi nəzərdə tutulur.