Paşinyan hakimiyyətdən gedəndən sonra onu və işçilərini lüks həyat gözləyir - Qərar qəbul olundu

Ermənistan hökuməti Nikol Paşinyanın səlahiyyət müddəti başa çatdıqdan sonra yaradılacaq ofisin maliyyələşdirilməsi məsələsini təsdiqləyib.

Den.az erməni mediasına istinadən xəbər verir ki, Ermənistanın baş nazirinin səlahiyyət müddəti hələ başa çatmayıb, lakin onun artıq virtual ofisi var və orada real maaşlı işçilər çalışır. Ermənistan hökumətinin bugünkü iclasında qəbul edilən qərarlardan biri də onun istefasından sonra baş nazir aparatının gələcək işçilərinin maaşlarının təsdiqi məsələsi olub. Qərara alınıb ki, Paşinyan olmadığı halda onlara müvafiq şəkildə 507, 407 və 274 min dram məbləğində aylıq maaş ödənilsin.

Ofisin 3 əməkdaşı olacaq, yəni illik əmək haqqı fondu 14,8 milyon dram (38 min dollar) təşkil edəcək. Ofis sahəsinin illik icarə haqqı dövlət büdcəsinə ildə 2 milyon drama başa gələcək. Maraqlıdır ki, qərar baş nazir Paşinyanın xaricdə olduğu üçün iştirak etmədiyi iclasda qəbul edilib. “Vəzifəli şəxslərin fəaliyyətinin, xidməti və sosial təminatlarının təmin edilməsi haqqında” qanuna 2022-ci ilin mayında dəyişiklik olunub. Beləliklə, istefada olan baş nazirin kabineti təqaüddə olan prezidentlərin kabinetlərinə əlavə edilib.

Qanuna dəyişikliklərdən sonra təqaüdə çıxan prezidentlərin 7 il, baş nazirlərin isə 10 il müddətinə fərdi dövlət mühafizəsi ilə təmin olunması müəyyənləşdirilib. Amma lazım gələrsə, müddət uzadıla bilər. Təqaüddə olan baş nazir, eləcə də prezidentlər mebelli kabinet, avtomobil, 3 nəfərlik aparat və kabinet rəhbərinin hazırkı maaşının 70%-i həcmində pensiya ilə təmin olunacaqlar. Bundan başqa, eks-prezident və eks-baş nazirin il ərzində ümumi müddəti 20 günə qədər olan digər ölkələrə səfərləri zamanı onların mühafizəsi də dövlət hesabına təmin ediləcək.

Den.az