ABŞ Yaxın Şərqdəki münaqişə zamanı dəymiş zərərin ödənilməsi üçün Fars körfəzindəki müttəfiqlərinə İran aktivlərinə çıxış imkanı verməyi planlaşdırır. Bu barədə Reuters mənbəyə istinadən məlumat yayıb. Jurnalistlərin qeyd etdiyinə görə, Vaşinqton bu vəsaitlərin daha əvvəl dəymiş ziyanın aradan qaldırılmasına yönəldilməsi imkanını da nəzərdən keçirəcək.
Nəşrdə bildirilib:
“ABŞ Fars körfəzindəki müttəfiqlərinin bərpasına dəstək vermək və gələcəkdə onlara dəyə biləcək zərəri kompensasiya etmək üçün İran aktivlərini onların istifadəsinə açacaq”.
ABŞ və İsrail fevralın 28-də İrandakı obyektlərə zərbələr endirməyə başlayıb. İlk gün ali dini lider ayətullah Əli Xamenei öldürülüb. Aprelin əvvəlində Vaşinqton və Tehran iki həftəlik atəşkəs elan edib. Bu müddət başa çatdıqdan sonra döyüşlərin yenidən başlanması barədə rəsmi məlumat verilməyib. Bununla belə, ABŞ İran limanlarına blokada tətbiq edib.
Paralel olaraq çərçivə memorandumu üzrə danışıqlar prosesi davam edir, lakin tərəflər vaxtaşırı ayrı-ayrı zərbələr mübadiləsi aparırlar.
