Microsoftun qurucusu və dünyanın ən tanınmış iş adamlarından biri olan Bill Qeyts, yetkinlik yaşına çatmayan qızlara qarşı cinsi istismar şəbəkəsi qurmaqda ittiham olunan və 2019-cu ildə həbsxanada ölü tapılan Ceffri Epşteyn işi üzrə aparılan araşdırma çərçivəsində ABŞ Nümayəndələr Palatasının Nəzarət Komitəsinə könüllü şəkildə ifadə verib, İHA xəbər verir.
Mətbuata qapalı keçirilən iclasın əvvəlində danışan Qeyts Epşteynin cinayət xarakterli fəaliyyətlərinə heç vaxt şahid olmadığını bildirib.
Qeyts Epşteynlə məsafə saxladığını deyərək, ictimaiyyətdə tez-tez gündəmə gələn münasibət iddialarına da cavab verib.
O bildirib:
Onun adasına, fermasına və ya Floridadakı evinə heç vaxt getməmişəm. Heç kimi zərərçəkən vəziyyətinə salmamışam. Epşteyn mənimlə şəxsi münasibət qurmağa çalışırdı, lakin mənim buna marağım yox idi və onun bu cəhdlərinə heç vaxt qarşılıq verməmişəm.
Ceffri Epşteynlə ilk dəfə 2011-ci ildə tanış olduğunu deyən Qeyts bildirib ki, Epşteyn qlobal səhiyyə layihələri üçün milyardlarla dollarlıq vəsait təmin edə biləcəyini iddia edib.
Qeyts Epşteynin keçmişdə hüquqi problemlər yaşadığını bildiyini, lakin onun törətdiyi cinayətlərin miqyasını tam anlamadığını söyləyib.
O deyib:
Görüşlərimizi öz maraqları üçün istifadə etməyə çalışdı. Əvvəldən onunla görüşməməli idim. Bu, böyük səhv idi.
Qeyts daha sonra Epşteyndən uzaqlaşmağa çalışdığını, lakin onun keçmişlə bağlı bəzi məlumatlardan istifadə edərək yenidən əlaqə qurmaq üçün təzyiq göstərdiyini iddia edib.
Milyarder iş adamı bildirib:
Epşteyn irəli sürdüyü çoxsaylı yalanlarla yanaşı, keçmişdəki sədaqətsizliklərimlə bağlı məlumatlardan istifadə edərək mənə təzyiq göstərməyə çalışırdı.
Qeyts Nümayəndələr Palatasının Nəzarət Komitəsinə verdiyi ifadənin zərərçəkənlərin ədalət axtarışına töhfə verməsini ümid etdiyini bildirib.
O deyib:
Ümid edirəm ki, Epşteynin cinayətlərinin zərərçəkənləri layiq olduqları ədalətə qovuşacaqlar.
ABŞ-lı maliyyəçi Ceffri Epşteyn 2002-2005-ci illər arasında yetkinlik yaşına çatmayan qızlara qarşı cinsi istismar şəbəkəsi qurmaq ittihamı ilə mühakimə olunmuşdu. Epşteyn 2019-cu ildə saxlanıldığı həbsxanada ölü tapılmış, səlahiyyətlilər onun ölüm səbəbinin intihar olduğunu açıqlamışdılar.
ABŞ Ədliyyə Nazirliyi tərəfindən ictimaiyyətə açıqlanan milyonlarla səhifəlik Epşteyn sənədlərində Bill Qeytsin adı və onun Epşteynlə çəkilmiş bəzi fotoları da yer almışdı.
Qeyts isə daha əvvəl verdiyi açıqlamalarda Epşteynin qanunsuz fəaliyyətlərindən xəbərdar olmadığını və heç bir cinayətə qarışmadığını bildirmişdi.
