ABŞ-ın Nyu-Cersi ştatında yaşayış binasının zibil borusuna düşən qadın xilas edilib. Bu barədə People məlumat yayıb.
İyunun 7-də 911 xidmətinə 14-cü mərtəbədə zibil şaxtasına düşən qadınla bağlı zəng daxil olub. Hadisə yerinə yanğınsöndürənlər, polis əməkdaşları və təcili tibbi yardım briqadası göndərilib.
Hadisə yerinə gələn xilasedicilər qadının təxminən 10 mərtəbə aşağı düşdüyünü və 3-cü ilə 4-cü mərtəbə arasında, zibil yığınının içində ilişib qaldığını müəyyən ediblər.
Xilasedicilər borunun panellərini mişarlarla kəsib və içəridəki zibilləri çıxarıblar. Nəhayət, qadını ayaqları irəli olmaqla borudan çıxarmağa nail olublar. Xilasetmə əməliyyatı təxminən 28 dəqiqə davam edib.
Paramediklər qadına təcili tibbi yardım göstəriblər. Hadisə zamanı bir yanğınsöndürən də əlindən xəsarət alaraq xəstəxanaya yerləşdirilib.
Xilasedicilər hələlik qadının zibil borusuna necə düşdüyünü bilmirlər.
