Britaniyalı Louri Denmanın beynində 38 parazit aşkar edilib.
Bu barədə Mirror nəşri məlumat yayıb.
Bildirilir ki, qadın Hindistana iki aylıq səfərindən sonra lentşəkilli qurd — donuz soliteri ilə yoluxub. Denman yoluxmadan qorunmaq üçün səfər zamanı vegetarian qidalanmaya üstünlük versə də, buna baxmayaraq infeksiyaya tutulub.
Məlumata görə, səfər 2007-ci ildə baş tutub. Dörd il sonra, 2011-ci ildə Denman nəcisində təxminən bir metr uzunluğunda lentşəkilli qurd aşkar edib. Bundan sonra onda güclü baş ağrıları və epileptik tutmalar başlayıb.
Həkimlər qadına neyrosistiserkoz diaqnozu qoyublar. Bu, parazitin səbəb olduğu və beyinə təsir edən infeksion xəstəlikdir.
Xəstəlik səbəbindən Denman tutma riski ilə əlaqədar sürücülük hüququndan məhrum edilib. Ona həmçinin evdə tək olduğu zaman vanna qəbul etməmək tövsiyə olunub.
Müalicə müddətində qadın işini buraxmalı və evindən ayrılmalı olub. Onda paranoya yaranıb və psixi vəziyyətinin pisləşməsi səbəbindən üç ay psixiatriya şöbəsində müalicə alıb.
Mirror-un məlumatına görə, 2017-ci ilə qədər Denmanın vəziyyəti yaxşılaşıb. Qadın artıq təxminən 10 ildir epileptik tutmalardan əziyyət çəkmir.
