Avstraliyada 13 yaşlı oğlan ailəsini açıq dənizdə xilas etməyə kömək etdikdən sonra qəhrəman kimi tanınıb. Bu barədə abc.net.au məlumat yayıb.
Məlumata görə, yeniyetmə 47 yaşlı anası, 12 yaşlı qardaşı və 8 yaşlı bacısı ilə birlikdə kayaklar və şişmə avarçəkmə lövhələri ilə dənizə çıxıb. Onlar sahildən uzaqlaşmağı planlaşdırmırdılar, lakin qəfil güclü külək qalxaraq ailəni açıq dənizə sürükləyib.
Hamını xilas etmək qərarını 13 yaşlı oğlan verib. O, qohumlarından ayrılaraq kayakla sahilə doğru hərəkət edib, lakin güclü dalğalar səbəbindən qayığı tərk etməli olub. Yeniyetmə əvvəlcə xilasedici jilet geyinmişdi, lakin iki saatdan sonra onu da çıxarıb. Sahilə çatmaq üçün daha iki saat üzməli olub. Ümumilikdə, o, təxminən dörd kilometr məsafə qət edib.
Sahilə çatan yeniyetmə xilasediciləri taparaq ailəsinin təhlükə altında olduğunu bildirib. Axtarışlar başlayıb və bir saat sonra qadın və iki uşaq sahildən 14 kilometr aralıda aşkarlanıb. Onlar suyun üzərində qalmaq üçün lövhədən yapışıblar.
Naturaliste dəniz xilasetmə xidmətinin komandiri Pol Bresland yeniyetmənin davranışını insan gücünü aşan bir addım kimi dəyərləndirib. O, həmçinin ananı bir neçə saat ərzində uşaqları ruhdan düşməyə qoymadığı üçün tərifləyib. Zərərçəkənlər artıq xəstəxanadan buraxılıb, vəziyyətləri yaxşıdır.
