Dizayner Andre Tan 2026-cı ilin yay mövsümündə dəbdə olacaq don modellərindən danışıb. Onun sözlərinə görə, bu yay həm rahat, həm də zərif görünüş yaradan modellər ön planda olacaq.
Dizaynerin seçdiyi modellər arasında SKIMS üslubunda maksi donlar xüsusi yer tutur. Bədənə oturan bu model həm hündürdaban ayaqqabı, həm də düz altlıqlı ayaqqabılarla kombin edilə bilər. Formasını yaxşı saxlayan material obrazı daha yığcam və zərif göstərir.
Yayın ən universal variantlarından biri isə köynək-dondur. Sərbəst biçimi və formasını qoruyan parçası sayəsində bu model həm rahat, həm də səliqəli görünüş yaradır.
Andre Tanın sözlərinə görə, kəsikli donlar da mövsümün əsas trendləri sırasındadır. Xüsusilə 90-cı illərin minimalizm üslubunu xatırladan, qolsuz və yüksək kəsikli modellər zərif yay obrazı üçün uyğun hesab olunur.
Daha gündəlik və rahat seçim istəyənlər üçün mayka-donlar tövsiyə edilir. Bu model şəhər gəzintiləri və istirahət üçün baza seçimlərdən biri sayılır.
Ofis üslubuna daha yaxın seçim axtaranlar üçün isə safari üslubunda donlar aktualdır. Bej, qəhvəyi və xaki tonlarında hazırlanan bu modellər daha ciddi və bahalı görünüş yaradır.
Dizayner həmçinin polo-donları da yay üçün uyğun variantlardan biri kimi qeyd edib. Bu modellər həm bədənə oturan, həm də oversize biçimdə istifadə edilə bilər. Onları bosonojka, ked, lofer və ya mokasinlərlə kombin etmək mümkündür.
Mövsümün daha iddialı trendlərindən biri isə alt paltarı üslubunda donlardır. Kombinasiya tipli, açıq dekolteli və incə biçimli modellər pencək və ya daha balanslı üst geyimlərlə tamamlandıqda gündəlik obrazda da istifadə oluna bilər.
