Mik Cagger, Devid Boui və Duran Duran rok qrupunun üzvlərinin səhnə obrazlarını yaradan britaniyalı dizayner Entoni Prays 80 yaşında vəfat edib. Bu barədə The Daily Beast məlumat yayıb.
Dizaynerin ölümünü onunla birlikdə çalışmış həmkarları və musiqiçilər təsdiqləyiblər. Ölümün səbəbi açıqlanmayıb. Vida mərasiminin tarixi və yeri daha sonra elan ediləcək.
Nəşrin məlumatına görə, Prays karyerası ərzində Britaniya kral ailəsinin üzvləri ilə də əməkdaşlıq edib. Böyük Britaniyanın hazırkı kraliçası Kamilla 1990-cı illərdən etibarən onun geyimlərini geyinib və rəsmi olaraq kral ailəsinə qoşulmazdan əvvəl də Praysla işləyib.
2025-ci ilin noyabrında, uzun müddət böyük podiumlardan uzaq qaldıqdan sonra Entoni Prays Londonun 16Arlington brendi ilə birgə hazırladığı 16 obrazdan ibarət kolleksiya ilə geri dönüb. Bu kolleksiya dizaynerin ölümündən cəmi bir ay əvvəl təqdim olunan son işi olub.
Entoni Prays 1945-ci ildə İngiltərənin Yorkşir qraflığında anadan olub. Peşəkar fəaliyyətinə başlamazdan əvvəl Londonun Kral İncəsənət Kollecini bitirib. Onun müştəriləri arasında The Rolling Stones, Roxy Music kimi məşhur qrupların üzvləri, eləcə də müğənni Lili Allen, model və aktrisa Cerri Holl və digər tanınmış simalar yer alıb.
