Gözəllik sənayesində dəblər sürətlə dəyişir. Bir neçə il əvvəl cazibədarlıq standartı hesab edilən bəzi kosmetik prosedurlar bu gün pasiyentlər üçün peşmanlıq səbəbinə çevrilir.
Belə prosedurlardan biri də üzün daha kəskin görünməsi və almacıq sümüklərinin vurğulanması məqsədilə Bişat yağlarının götürülməsi əməliyyatıdır.
NewBeauty nəşrinə danışan plastik cərrah Qoretti Ho Tağva bildirib ki, vaxtilə özü də bu əməliyyatı həyata keçirib, lakin hazırda pasiyentlərə demək olar ki, heç vaxt tövsiyə etmir.
Onun sözlərinə görə, əməliyyatdan çəkindirdiyi pasiyentlər illər sonra geri qayıdaraq ona təşəkkür edirlər.
Dolğun yanaqlar qüsur deyil
Bir çox gənc üzündəki yumruluğu artıq həcm hesab edərək ondan xilas olmağa çalışır. Lakin yaş artdıqca üzdəki təbii yağ həcmi tədricən azalır.
Cərrahın sözlərinə görə, üzün yaşlanması yalnız dərinin elastikliyini itirməsi ilə bağlı deyil. Eyni zamanda üzün quruluşu dəyişir, yağ toxuması azalır və nəticədə çökəkliklər, kölgələr, yorğun və arıq görünüş yaranır.
Sonradan plastik cərrahlar məhz itirilmiş bu həcmi müxtəlif prosedurlar vasitəsilə bərpa etməyə çalışırlar.
Bu səbəbdən mütəxəssis hesab edir ki, gənc yaşda sağlam yağ toxumasının götürülməsi gələcəkdə ciddi peşmanlıq yarada bilər.
Sosial şəbəkələr əməliyyatı dəbə çevirdi
Bişat yağlarının götürülməsi əməliyyatının populyarlıq zirvəsi 2021–2022-ci illərə təsadüf edib.
Sosial şəbəkələrdə əməliyyatın nəticələrini göstərən çoxsaylı videolar yayılıb, prosedurla bağlı paylaşımlar yüz milyonlarla baxış toplayıb.
Əməliyyat daha ifadəli almacıq sümüklərinə və daha incə üz quruluşuna sahib olmağın sürətli yolu kimi təqdim edilirdi.
Qadınlar daha çökük yanaqlar, kişilər isə daha aydın çənə xətti əldə etmək istəyirdilər. Lakin fərqli estetik məqsədlərə baxmayaraq, əməliyyatın uzunmüddətli nəticələri bir çox pasiyentdə eyni olub.
Bir neçə ildən sonra nə dəyişdi?
Hazırda bu əməliyyatı etdirmək istəyənlərin sayı xeyli azalıb. Bunun əvəzində bir neçə il əvvəl prosedurdan keçmiş və artıq görünüşündən narazı olan insanlar plastik cərrahlara daha çox müraciət edirlər.
Təxminən 40 yaşlarında onlar üzlərinin həddindən artıq arıq, yorğun və təbii ahəngini itirmiş göründüyünü hiss etməyə başlayırlar.
Cərrahın sözlərinə görə, Bişat yağları sadəcə artıq yağ deyil. Onlar üzün orta və aşağı hissəsini dəstəkləyən mühüm struktur funksiyasını yerinə yetirir.
Bu toxuma adi yağdan fərqli olaraq pəhriz və fiziki məşqlərə demək olar ki, reaksiya vermir və üzün ayrıca anatomik qatlarından biri hesab olunur.
Bişat yağları götürüldükdən sonra təbii yolla yenidən bərpa olunmur.
Müasir plastik cərrahiyyə insanın öz yağının köçürülməsi ilə itirilmiş həcmi qismən bərpa edə bilər. Lakin həkimin sözlərinə görə, üzün təbii anatomiyasını tam şəkildə əvvəlki vəziyyətinə qaytarmaq demək olar ki, mümkün deyil.
Gözəllik dəbdən asılı olmamalıdır
Mütəxəssis yalnız bu əməliyyatdan deyil, müasir estetik tibbdəki ümumi tendensiyadan da narahatdır.
Sosial şəbəkələrdə yaranan dəbin təsiri ilə insanlara daha çox kosmetik prosedur təklif olunur. Halbuki bu müdaxilələrin nəticələri illərlə, bəzən isə ömürlük qala bilər.
Cərrah həddindən artıq dodaq böyütmə, çoxsaylı dolğular, aqressiv üz konturlaması və daha kəskin çənə xətti yaratmaq üçün sağlam toxumaların götürülməsini buna nümunə göstərib.
O, yaşlanma əlamətləri yaranmamış insanlara təklif edilən “profilaktik” üz gərmə əməliyyatlarına da şübhə ilə yanaşır.
Mütəxəssisin fikrincə, plastik əməliyyat yaşlanmanın qarşısını almır. Əksinə, erkən müdaxilə gələcəkdə daha mürəkkəb və təkrar əməliyyatlara ehtiyac yarada bilər.
Həddindən artıq prosedurlar üzü dəyişdirir
Cərrah bildirib ki, qeyri-təbii və uğursuz hesab edilən üz görünüşü çox vaxt bir neçə amilin birləşməsi nəticəsində yaranır.
Bunlara kəskin arıqlama, Bişat yağlarının götürülməsi, həddindən artıq dolğu və botulotoksin istifadəsi, eləcə də ixtisası kifayət qədər olmayan şəxslərin inyeksiya tətbiq etməsi daxildir.
Onun sözlərinə görə, prosedurların həddindən artıq tətbiqi üzə qeyri-təbii görünüş verir və sonrakı korreksiyanı çətinləşdirir.
Mütəxəssisin tövsiyəsi
Üzün daha ifadəli görünməsi üçün hər zaman toxumaların götürülməsinə ehtiyac yoxdur.
Bəzən üzün yumruluğu əzələlərin quruluşu, üz proporsiyaları və ya genetik xüsusiyyətlərlə bağlı olur.
Bir çox halda üzün təbii həcmini azaltmaq əvəzinə, onun təbii quruluşunu vurğulamaq daha ahəngdar nəticə verir.
Çünki üzün orta hissəsindəki həcm yanaqların formasını qoruyur və daha gənc görünüş yaradır.
Dəb gəlib keçir, plastik əməliyyatların nəticələri isə onilliklərlə qalır.
