"Azərbaycan Ermənistanın silahlandırılma marşrutuna girməməsi üçün prioritetlərə malikdir. Bu, rəsmi Bakının sülh və təhlükəsizlik gündəliyinin komponentlərindən biridir. Gələcəkdə bu məsələ Ermənistanın belə demək mümkündürsə, hərbisizləşdirilməsi prioritetləri kimi danışıqlar masasına gətirilə bilər. Belə bir məqamda isə Fransanın Ermənistana “Caesar” özüyeriyən artilleriya qurğuları satması ciddi narahatlıq doğurur. Bu məlumatlara Azərbaycanın diplomatik-siyasi korpusu ilə yanaşı Müdafiə Nazirliyinin də sərt reaksiya verməsi diqqətdən kənarda qala bilməz. Müdafiə Nazirliyinin açıqlaması o mənaya gəlir ki, Azərbaycan kəşfiyyatında həmin silahların hansı koordinatlar üzrə yerləşdiriləcəyinə dair məlumatlar var və onların sərhəd bölgəsinə gətirilməsi istisna deyil".
Bu fikirləri "Den.az"a açıqlamasında politoloq Aqşin Kərimov səsləndirib. O bildirib ki, Azərbaycan tərəfi əlində olan ciddi və etibarlı məlumatlardan yola çıxaraq deyir ki, Fransa silahları Ermənistanın müdafiə qabiliyyəti üçün deyil, hücum əmrləri yerinə yetirmək üçün regiona gətirilir.
"Üstəlik məsələnin mümkün perspektiv izahı belədir ki, əgər həmin silahlarla Azərbaycan mövqelərinə atəş açılsa, Azərbaycan həmin atəş nöqtələrini susdurmaq hüququndan istifadə edəcək. Yəni silahın hansı ölkəyə məxsus olmasından asılı olmayaraq Azərbaycan müdafiə hüququndan yararlanıb lazımı taktiki addımlar atmaq səlahiyyətinə malikdir. Hərçənd ki, Fransanın Ermənistana verdiyi silahların regionda qüvvələr nisbətinə ciddi təsir edəcəyini də proqnozlaşdırmıram. Çünki özüyeriyən artilleriya sistemi ilə Ermənistan regiondakı reallıqları dəyişə bilməz. Azərbaycanın narahatlığı əsasən, regionu qarşıdurma məkanına çevirmək istəyən Fransanın ambisiyaları ilə bağlıdır. Yəni Fransa Ermənistanı silahlandırma siyasəti ilə regionu ortamüddətli və uzunmüddətli silahlı münaqişə məkanına çevirmək istəyir ki, bu da Azərbaycanın irəli sürdüyü sülh və təhlükəsizlik gündəminə qətiyyən uyğun deyil. Bununla belə, hesab aparmaq olar ki, Fransa Ermənistanı Azərbaycana qarşı şirnikləndirsə belə, bu, yalnız İrəvanın zərərinə nəticə verəcək. Başqa bir məqama da nəzər salaq. Fransa növbəti təxribat fəaliyyətinə həm də o zamanda getdi ki, Brüsseldə Avropa İttifaqı-Azərbaycan Təhlükəsizlik Dialoqunun iclası keçirilirdi.
Beləliklə, Fransa planlaşdırır ki:
1. Avropa İttifaqının Azərbaycana olan mövqeyini rəsmi Parisin diktəsi altına salsın,
2. Avropa İttifaqının sülh və təhlükəsizliyi qarantı olduğu görüntüsünü yaratmağa çalışır, əks təqdirdə, İttifaqa Cənubi Qafqazda əlavə başağrısı verəcəyina eyham vurur,
3. Qlobal tabloda itirdiyi mövqelərinin əvəzini Cənubi Qafqazda kompensasiya etsin. Burada Fransa Türkiyə, Rusiya ilə yanaşı, NATO üzvləri olan Böyük Britaniya və ABŞ ilə də rəqabətdədir.
Ancaq Fransanın Cənubi Qafqazda üzləşdiyi rəqiblərin siyahısı belə deməyə əsas verir ki, Parisin burada oynaya biləcəyi kartlar çox zəifdir".
Günəş Fərəh
Den.az
