O taydan bu taya fətva "tullayan"lara SƏRT REAKSİYA: "Guya o deməsəydi, biz bilmirdik"

"Azərbaycan torpaqlarının işğal altında olduğu 30 ilə yaxın zaman kəsiyində bəzi müsəlman ölkələri Ermənistana pulsuz PUA, bizə isə minnətli dua göndərirdilər. Hətta aralarında o taydan bu taya fətva "tullayanı" da olurdu. İrad bildirində də qəzəbli şəkildə filankəs "Qarabağın müsəlmanların torpağı olduğunu deyib" cavabını verirdilər. Guya o deməsəydi, biz bilmirdik".

Bu fikirləri "Den.az"a açıqlamasında politoloq Elçin Mirzəbəyli səsləndirib. Onun sözlərinə görə, filankəs deməliydi ki, "Qarabağ Azərbaycan torpağıdır". Çünki beynəlxalq hüququn müstəqil subyekti olan Azərbaycan Respublikasıdır, islam dini deyil: "Qarabağ da Azərbaycan Respublikasının beynəlxalq səviyyədə tanınmış suveren ərazisidir. Digər tərəfdən, Azərbaycan çoxkonfessiyalı bir dövlətdir və Qarabağ da dinindən, milli mənsubiyyətindən asılı olmayaraq, bu dövlətdə yaşayan bütün Azərbaycan vətəndaşlarının vahid vətənlərinin ayrılmaz bir parçasıdır. 
İndi işğalçı üzərində Zəfər çalmağımız, suveren hüquqlarımızı bərpa etməyimiz üçün bizə PUA göndərənlərə dua edək, yoxsa düşmənə PUA, bizə isə minnətli dua göndərənlərə, yaxud uzun illər boyu torpaqlarımızın işğalının davam etdirilməsi üçün Ermənistanla həmrəy olanlara?
Bəzən bu mövzuda fikirlərimizə irad bildirirlər. Amma Allah bizə ağıl, məntiq, müstəqil düşünmək, qərar qəbul etmək, ağı-qaradan seçmək potensialı verib. Kimsə şüurunu boşboğaz və savadsız, insan emosiyalarına təsir etməklə özünə gün qazananların istifadəsinə veribsə, bu, onun öz problemidir", - deyə politoloq fikirlərini tamamlayıb.

Günəş Fərəh,

Den.az