Avropa ölkələri NATO-nun Ankara sammitində ABŞ-a alyans daxilində liderliyi öz üzərinə götürə biləcəyini göstərmək imkanını əldən verib.
Bu fikri ABŞ-ın NATO yanında keçmiş daimi nümayəndəsi İvo Daalder Politico üçün yazdığı məqalədə bildirib.
Onun sözlərinə görə, Avropa İttifaqı ölkələri bu fürsətdən istifadə etmək əvəzinə, silah almağa səssiz şəkildə razılaşıblar.
Daalder qeyd edib ki, alyans liderləri sammitdən Donald Tramp ABŞ-a rəhbərlik etdiyi müddətdə belə görüşlərin ciddi nəticə vermədiyi düşüncəsi ilə ayrılıblar. O, sammitin yekun bəyannaməsini də sərt tənqid edərək sənədin “yazıldığı kağıza belə dəymədiyini” bildirib.
Keçmiş diplomatın sözlərinə görə, ABŞ lideri kameralar qarşısına çıxan kimi müttəfiqlərinə qarşı sərt ifadələr işlədib. O, Böyük Britaniya, Fransa, Almaniya və Belçikanı İranla münaqişədə iştirak etmək istəmədiklərinə görə tənqid edib. Daha sonra ispaniyalıları da ağır sözlərlə hədəfə alıb və onlarla ticarət əlaqələrinin dayandırılmasını tələb edib. Tramp həmçinin Qrenlandiyanın ABŞ-ın bir hissəsinə çevrilməli olduğunu yenidən bəyan edib.
Daalder hesab edir ki, NATO-nun baş katibi Mark Rutte Trampı sakitləşdirməyə həddindən artıq çox enerji sərf edir. Onun fikrincə, bunun əvəzinə Avropanın NATO-nun müdafiə proseslərində əsas rolu necə üzərinə götürə biləcəyini müəyyən edən strategiya hazırlanmalıdır.
Keçmiş diplomat vurğulayıb ki, Avropa İttifaqı, məsələn, ABŞ-ın qitədən çıxara biləcəyi qüvvələrin yerini doldurmaq üçün konkret plan hazırlamalıdır.
“Yeni reallıq budur: ABŞ artıq etibarlı müttəfiq deyil. Hətta yeni prezident NATO-ya sadiqliyini təsdiqləsə belə, Avropa öz müdafiəsi üçün daha böyük məsuliyyət götürməlidir”, - deyə Daalder yekunlaşdırıb.
