ABŞ milli kəşfiyyat direktorunun ofisinin saytında yayılan məlumatda sabiq prezident Co Bayden administrasiyası xaricdəki ABŞ tərəfindən maliyyələşdirilən biolaboratoriyalarla bağlı ictimaiyyəti aldatmaqda ittiham olunub.
Məlumatda bildirilir ki, Bayden administrasiyasındakı siyasətçilər, səhiyyə sahəsində bəzi mütəxəssislər və milli təhlükəsizlik strukturları ABŞ tərəfindən maliyyələşdirilən xarici biolaboratoriyaların mövcudluğu barədə Amerika xalqına yalan məlumat veriblər. Həmçinin bu mövzuda həqiqəti açıqlamağa çalışan şəxslərə təzyiq göstərildiyi iddia olunur.
Qeyd edilir ki, iyunun 12-də ABŞ Milli Kəşfiyyat Direktorunun ofisinin saytında Vaşinqtonun 30-dan çox ölkədə 120 biolaboratoriyanı maliyyələşdirdiyinə dair məxfilikdən çıxarılmış məlumatlar dərc olunub.
Bu məlumatların açıqlanması vəzifəsini tərk etməyə hazırlaşan kəşfiyyat rəhbəri Tulsi Qabbardın vədlərindən biri kimi təqdim olunur. Qabbard bildirib ki, ABŞ-ın hazırkı prezidenti bu fəaliyyətin təhlükəsini anlayır və xarici laboratoriyaların maliyyələşdirilməsinin dayandırılması barədə qərar qəbul edib.
Press-relizdə qeyd olunur ki, həmin obyektlərin bir çoxunda təhlükəli və yoluxucu patogenlərlə bağlı tədqiqatlar aparılıb və ya əvvəllər aparılmış ola bilər. Məlumata görə, bu tədqiqatlar bəzi hallarda patogenlərin yeni xüsusiyyətlər qazanması ehtimalını da əhatə edib.
Qabbardın açıqlamasına əsasən, ABŞ-a bağlı biolaboratoriyaların Ukraynada da mövcud olduğu bildirilir. Onun sözlərinə görə, Amerika kəşfiyyat qurumları bu laboratoriyalardan birində təhlükəli patogenlərin saxlanıla biləcəyi və döyüşlər zamanı həmin obyektin zərər görmə riski barədə xəbərdarlıq ediblər.
Qabbard iddia edib ki, bu laboratoriyaların mövcudluğuna dair sübutlar indiyədək “güclü şəxslər” tərəfindən qəsdən amerikalılardan gizlədilib.
