Nuradan forumda təklifinə irad bildirən bəstəkara cavab

"Musiqimizi təbliğ ediriksə, onu müasirləşdirmək üçün Qızıl Fondu dijital platformalara köçürməliyik. Və təbliğatını sosial şəbəkələr və dijital platformalar vasitəsilə etməliyik". 

Den.az Axşam.az-a istinadən xəbər verir ki, bunu Ümummili Lider Heydər Əliyevin 100 illik yubileyi çərçivəsində Bakıda ilk dəfə keçirilən Musiqi Forumunda müğənni Nura Suri səsləndirib. 

Nura fikirlərini bölüşərək "Çünki Azərbaycan musiqisini, tarixini bilmək və gənclərimizin də musiqilərimizi tanımasını istəyiriksə bunu etməliyik. Çünki gənclər musiqiləri internətdən izləyirlər: bunlar yutub, "spotify" və sair platformalarda olmalıdır" sözlərini deyib.

Tədbirdə moderator qismində yer alan bəstəkar Türkər Qasımzadə isə Nura Suriyə etirazını bildirərək bu təklifin başqa tədbirin mövzusu olduğunu bildirib. 

İfaçı isə bəstəkara "Burada olduğuma görə bu təklifi irəli sürmək istədim. Digər tərəfdən musiqilərin sözləri vikipediya üzərində işlədilmir" cavabını verib.

T.Qasımzadə "Musiqi" sözü cəm şəkilçisi qəbul etmir. "Musiqilər" sözü səhvdir" deyə, ifaçıya irad bildirib. 

Nura Suri isə T.Qasımzadəyə "Bir az əvvəl bir neçə insan çıxış edəndə "sizlər" deyə müraciət etdi. Halbuki "siz" cəm şəklindədir. Danışanda səhv edə bilərik. Bir məqamı da vurğulamaq istəyirəm ki, Azərbaycan musiqisinin təbliğatında telekanalların rolu böyükdür. Orada çalışan aparıcılar da Azərbaycan dilində mükəmməl danışmalı və o qədər savadlı olmalıdırlar ki, oraya dəvət alan mədəniyyət işçiləri və yaxud da Zeynəb Xanlarova kimi sənətkar ilə söhbət edə bilsinlər. Bunun üçün də Azərbaycan telekanallarında çalışan aparıcılara da diqqət etmık lazımdır" reaksiyasını verib.

Nuradaha sonra Den.az-a məsələ ilə bağll geniş açıqlama verib. O bildirib ki, mədəniyyətin təbliği zəif aparılır: 

“İlk dəfə deyil bunu deyirəm. Övladlarımız Qızıl Fondda olan mahnını bilmir. Qalıb elə orda. Onu müasirləşdirib, cavanlara çatdırmalıyıq. Bundan pul da qazanmaq olar. Nazirliyin tərkibində dijital platformaya, buna maliyyə ayıran sahə olmalıdır. Fərqli dünyada yaşayarıq və bununla ayaqlaşmalıyıq. Hazırda İctimai TV-də belə layihə var ki, gənclər həmin əsərləri oxuyur. Tamaşalar lentə alınmalıdır, yutuba yerləşdirilməlidir. Mən Münəvvər Əliyeva ilə Hikmət Rəhimovun “Qatil” tamaşası artıq səhnələşdirilmir. Mən onu necə izləyim? Opeta və Balet, digər teatrlarda tamaşalar lentə alınmalıdır və yutuba yerləşdirilməlidir ki, gənclər izləyə bilsin. Televiziyada səlis danışan aparıcılar olmalıdır. Təbliğat olmalıdır. Televiziya nə haldadır? Bir İTV, bir də Leyla Quliyeva apardığı verilişdə səlis danışır”.