Rusiya Prezidenti Vladimir Putinin Azərbaycan Prezidenti İlham Əliyev və Ermənistanın baş naziri Nikol Paşinyanla ayrılıqda görüşlərinə dair maraqlı tezislər səsləndirilir.
Siyasi şərhçi Aqşin Kərimov öz tezislərini "Den.az"la bölüşüb.
TEZİSLƏR:
1. Rusiya Cənubi Qafqazda Azərbaycan-Ermənistan münasibətlərinin tənzimlənməsini əlinə keçirməklə ABŞ ilə olan güc rəqabətinin ölçülərini dəyişmək üçün mübarizə aparır. Bunun üçün
Putin:
- Nikol Paşinyana şirnikləndirici vədlər verərək Ermənistanı Qərb oriyentasiyasından çıxarmaq üçün çalışır,
- İkinci mərhələdə isə Putin Azərbaycan-Ermənistan liderlərinin danışıqlarında vasitəçi qismində görünməklə növbəti həmləsini etməyə cəhd edəcək,
- Bu, əsasən Rusiyanın moderatorluğu ilə Paşinyanı Zəngəzur dəhlizinə Azərbaycanın istədiyi və tələb etdiyi kontekstdə razı salmaq formullarını əhatə edir.
2. Rusiya Ukraynada başlatdığı müharibədə qələbə qazana bilmək fonunu təbliğ edir və bununla Qərbi Cənubi Qafqazda da məğlub edə biləcəyi görüntüsünü təqdim edir:
- Rusiya bu məsələdə Ermənistan üzərindən manipulyativ əməliyyatlar qurmaq səylərini nümayiş etdirir,
- Putinlə Paşinyanın görüşündə müsbət atmosfer öhdəliyi yaradılmağa çalışılması İrəvanın Moskvanın tələbləri və şərtləri qarşısından tam qaça bilmədiyini göstərir,
- Çünki Paşinyanın Rusiyaya qarşı “qeyri-ənənəvi” siyasətinə baxmayaraq Ermənistanın Moskva önündə açıq-aşkar zəif tərəfləri var.
3. Putinin Əliyevlə görüşü Rusiya-Azərbaycan əlaqələrinin inkişafının regiona və Ermənistana təsirlərini ölçmək baxımından önəmlidir.
Yəni:
- Paşinyanın Putinlə görüşü Rusiya-Ermənistan əlaqələrinin normallaşdırılmasına cəhddirsə, Əliyevlə Putinin müzakirələri çox geniş regional konteksti özündə birləşdirir,
- Bu, ümumilikdə Bakı-İrəvan sülh proqramı çərçivəsində Ermənistanın oyun qurmağa çalışsa da, onun hədsiz zəifliklərinin müəyyən edilməsi üçün mövcud tənlikləri həll edir.
Beləliklə:
- İlham Əliyev Azərbaycanın güc, prestij və təhlükəsizliyini artırmaq proqramını gücləndirir,
- Nikol Paşinyan isə Putini Moskva vasitəsilə Azərbaycanın önünə keçəcək düsturları tapmağa sövq edir,
- Azərbaycan güclü əl olduğundan Putin-Paşinyan danışıqlarından Ermənistanın əldə edə biləcəyi strateji nəticə yoxdur, buna görə də, Bakı ilə İrəvanın Moskvanın tərəzisində sülh proqramı üzrə bərabər tərəfli olacağı ehtimalları yoxdur.
Günəş Fərəh
Den.az
