Sumqayıtda Birinci Qarabağ müharibəsinin şəhidi Elman Cavadov dəfn edildi-REPORTAJ

Bakı şəhərindəki I Şəhidlər xiyabanında naməlum şəhid kimi dəfn edilmiş Birinci Qarabağ müharibəsində itkin düşmüş hesab olunan Elman Xurşud oğlu Cavadovla Sumqayıt şəhərində keçirilən vida mərasimi başa çatıb. 

Den.az xəbər verir ki, əvvəlcə şəhidin nəşi dəfn olunması üçün Sumqayıt Şəhidlər xiyabanına gətirilib. 

Dəfn mərasimində şəhidin doğmaları, Sumqayıt Şəhər İcra Hakimiyyətinin başçısı Zakir Fərəcov,  şəhərin hüquq-mühafizə orqanlarının əməkdaşları, hərbçilər və ictimaiyyət nümayəndələri iştirak ediblər.

Şəhidin ruhuna dualar oxunub. Qəhrəmanımızın keçdiyi döyüş yolundan, rəşadətli Azərbaycan Ordusunun 44 günlük vətən müharibəsindəki şücayətindən ətraflı bəhs edilib. Bildirilib ki, İkinci Qarabağ müharibəsi bizim şanlı tariximizdir. Bu Qələbə tarixdə əbədi qalacaq. Azərbaycan Silhalı Qüvvələri 44 gün ərzində düşmən ordusunu məhv edərək öz ərazi bütövlüyünü tam təmin etdi. Biz düşməni topaqlarımızdan qovduq və ədaləti, beynəlxaq hüququ bərpa etdik. Bu gün Azərbaycan xalqı müzəffər xalq kimi yaşayır. Şəhid bacısı Sədaqət Şirinova isə çıxışında deyib ki,  "Buna da şükür edirik, heç olmasa, məzarı oldu". "Anam və atam dərdinə dözə bilmədilər". Sədaqət Şirinova qardaşı ilə bağlı xatirələrindən danışıb. Bildirib ki, "Qardaşı 1992-ci ildə həqiqi hərbi xidmətə çağırılıb. Həmin ilin iyunun 19-da Ağdərənin Atrek kəndində 41 nəfərlə birlikdə itkin düşüb. Çox vətənpərvər olub. 32 il onun yolunu ümidlə gözləyiblər. Sevinirik ki, ziyarət edəcəyimiz artıq yer var.

Şəhid Elman Cavadov yaylım atəş sədaları altında Sumqayıt Şəhər Şəhidlər Xiyabanında torağa tapşırılıb.