Siqaret çəkmək beynin qocalmasını sürətləndirir və demensiya riskini artırır.
DenMedia.az xəbər verir ki, bunu NEWS.ru-ya həkim-terapevt, qastroenteroloq, naturopat və geriatriya mütəxəssisi Yelena Pavlova bildirib.
Onun sözlərinə görə, nikotin damarları daraldır, beyin qan dövranını zəiflədir və neyronlarda oksigen çatışmazlığı yaradır. Bu isə yaddaşın və idrak funksiyalarının zəifləməsinə gətirib çıxarır.
“Siqaret təkcə ağciyərlərə deyil, beyinə də ciddi zərər vurur. Nikotin yaddaşı pisləşdirir, diqqəti azaldır, düşünmə qabiliyyətini zəiflədir. Bunun əsas səbəbi damarların daralması və beyinə oksigenin çatmamasıdır. Uzunmüddətli siqaret çəkmə beynin erkən qocalma prosesini başladır,” — deyə Pavlova izah edib.
Həkimin sözlərinə görə, siqaret çəkənlərdə beynin “boz maddə” həcmi daha tez azalır, xüsusilə məntiq və yaddaş üçün cavabdeh sahələrdə. Bundan əlavə, nikotin dopaminin — motivasiya və məhsuldarlığa cavabdeh hormonun — səviyyəsini azaldır.
Pavlova qeyd edib ki, nikotin qısa müddətli enerji hissi yaratsa da, sonra yorğunluq və əsəbilik yaranır, bu isə diqqəti və iş qabiliyyətini azaldır.
Araşdırmalar göstərir ki, siqaret çəkənlərdə neyrodegenerativ xəstəliklərin, o cümlədən Altsheymer və demensiyanın riski iki dəfə artır.
Bu, damar zədələnməsi və beyində amiloid yığıntılarının formalaşması ilə bağlıdır.
“Nikotin beynin dopamin istehsalını pozur, buna görə insanın motivasiyası zəifləyir. Qısa müddətli diqqət artımı yerini yorğunluq və qıcıqlanmaya verir, bu isə istər-istəməz məhsuldarlığa təsir göstərir,**” — həkim yekunlaşdırıb.
