Türkmənistanın “türkmən alabayının yetişdirilməsi sənəti” adlı nominasiya müraciəti UNESCO-nun bəşəriyyətin qeyri-maddi mədəni irsinin Reprezentativ Siyahısına daxil edilib. Bu barədə ölkənin Dövlət Teleradio Komitəsinin saytı məlumat yayıb.
Qərar 11 dekabrda Nyu-Dehlidə keçirilən UNESCO-nun qeyri-maddi mədəni irsin qorunması üzrə 20-ci hökumətlərarası komitə sessiyasında yekdilliklə qəbul edilib.
Komitənin bütün 24 üzvü Türkmənistanın təqdim etdiyi dosyenin hazırlanmasını yüksək qiymətləndirib. Sənəd UNESCO üzrə Türkmənistan Milli Komissiyası və beynəlxalq “Türkmən alabayları” assosiasiyası tərəfindən hazırlanıb. Nominasiya prosesinə həmçinin ustalar, itçi ailələri, alimlər və bu nadir cinsin biliciləri fəal şəkildə cəlb olunub. Xüsusilə qadınların ənənənin qorunmasındakı rolu vurğulanıb.
Sessiyada dövlət siyasəti çərçivəsində, yerli idarəetmə qurumları, QHT-lər və ənənənin daşıyıcıları ilə birlikdə həyata keçirilən mühafizə və dəstək tədbirlərinə xüsusi diqqət yetirilib. Bu səylər irsin davamlı şəkildə qorunmasına və nəsillərarası ötürülməsinə şərait yaradır.
