Sosial şəbəkələrdə son günlər belə fikir yayılıb ki, qəhvə ilə darçın birlikdə qaraciyərə zərər vurur. Şəkərli və südlü qəhvənin ziyanı barədə tez-tez danışılırdı, indi isə hədəfə darçın gəlib. Məsələyə həkim-qastroenteroloq Klara Sıçuqova aydınlıq gətirib — onun açıqlamasını NEWS.ru yayıb.
“Məsələ darçında yox, ‘kumarin’ adlı maddədədir.”
Həkimin sözlərinə görə, problem nə qəhvədə, nə də darçında deyil — əsas məsələ kumarin adlanan maddədədir. Bu birləşmə böyük dozada qəbul edilərsə, qaraciyərə toksik təsir göstərə bilər.
Avropa Qida Təhlükəsizliyi Agentliyi bildirir ki, insan üçün təhlükəsiz gündəlik doza 0,1 mq/kq-dır. Bu isə 70 kq çəkisi olan bir insan üçün təxminən 7 mq kumarin deməkdir — 1–2 çay qaşığı darçına bərabər.
Qəhvəyə əlavə olunan darçın isə adətən cəmi bir çimdikdir, yəni 1 qramdan qat-qat azdır. Bu miqdar qaraciyərə heç bir yük yaratmır.
Darçının iki növü var: hansını seçdiyiniz vacibdir
Darçının iki əsas növü mövcuddur:
-
Seylon darçını — kumarin miqdarı çox azdır, daha keyfiyyətli və bahalıdır;
-
Kassiya darçını — kumarin çoxdur, ucuzdur və mağazalarda ən çox satılan məhz budur.
Kafe və restoranlarda istifadə olunan darçın tozu adətən kassiyadır.
Kimlər diqqətli olmalıdır?
Darçın əksər insanlar üçün təhlükəsiz olsa da, bəzi qruplara ehtiyat tövsiyə olunur:
• xroniki qaraciyər problemi olanlar
• hamiləlik və südvermə dövrü
• allerqiya və fərdi həssaslıq
Bir fincan qəhvəyə əlavə olunan bir çimdik darçın qaraciyəri zədələmək gücündə deyil. Təhlükə yalnız darçının həddindən artıq, xüsusilə də kassiya növünün davamlı şəkildə böyük miqdarda istifadəsindədir.
