Sağ çiyində yaranan qeyri-adi ağrı təhlükəli xəstəlik – qaraciyər xərçənginin erkən əlaməti ola bilər. Bu barədə Daily Express yazır.
Onkoloqlar bildirir ki, belə narahatlıq çox vaxt periodik olur və yalnız oynaqda hiss edilir, bütün qola yayılmır. Buna görə də insanlar onu çox vaxt ciddi qəbul etmir.
Adətən bu əlamət idmandan sonra yorğunluq, əzələ dartılması və ya yanlış duruş ilə qarışdırılır. Lakin onkoloq İrji Kubes qeyd edir ki, təhlükəli xəstəliklərin ilkin simptomları çox vaxt zəif olur və buna görə də insanlar onları görməzdən gəlir.
“Qaraciyər xərçəngi ‘uzaq ağrı’ yarada bilər. Bu zaman ağrı qarında deyil, çiyində hiss olunur. Bu, orqanın çiyinlə əlaqəli sinirlərə yaxın yerləşməsi ilə bağlıdır”
Məlumata görə, British Liver Trust və Liver Cancer UK təşkilatlarının açıqlamasına əsasən, Böyük Britaniyada hər il təxminən 6000 nəfərdə qaraciyər xərçəngi diaqnozu qoyulur. Ölüm göstəricisi isə ən geniş yayılmış xərçəng növləri arasında ən sürətlə artanlardan biridir.
Qeyd olunur ki, bu xəstəliyin yalnız 10 hadisədən 3-ü erkən mərhələdə aşkar edilir.
NHS-in məlumatına görə, əsas simptomlar bunlardır:
- dərinin və göz ağlarının saralması
- iştahanın azalması
- kəskin çəki itkisi
- daimi yorğunluq
- tez-tez xəstələnmə
- qarının sağ tərəfində şişkinlik və ya düyün
- qarının sağ yuxarı hissəsində ağrı
- sağ çiyində ağrı
- həzm pozuntusu
- köp
- ürəkbulanma
Dərinin və gözlərin saralması – sarılıq – qaraciyərin ciddi zədələnməsinin göstəricisi ola bilər.
Həkimlər xəbərdarlıq edir ki, əgər səbəbsiz arıqlama, qarında bərklik və ya digər simptomlar iki həftədən çox davam edərsə, mütləq həkimə müraciət etmək lazımdır.
“Bu simptomlar müxtəlif xəstəliklərlə bağlı ola bilər və hər zaman xərçəng demək deyil. Amma vaxtında müayinə çox vacibdir”
