Cümə axşamı bir sıra ölkələrin liderləri ABŞ Prezidenti Donald Trampın təşəbbüsü ilə formalaşdırılmış Sülh Şurasının ilk iclasında iştirak etmək üçün Vaşinqtona səfər edəcəklər. Görüşdə Qəzza sektorunun gələcəyi müzakirə olunacaq.
Toplantı Vaşinqtondakı Sülh İnstitutunda keçiriləcək. Qurum yaxın zamanda Donald Trampın adını daşıyan Sülh İnstitutu kimi yenidən adlandırılıb.
İclasın əsas mövzusu Qəzzanın yenidən qurulması planı olacaq. Gözlənilir ki, ABŞ Şura üzvlərinin Qəzzada humanitar yardım və bərpa işləri üçün ümumilikdə 5 milyard dollar ayırmaq niyyətində olduqlarını elan edəcək.
Məlumata görə, Şura üzvləri həmçinin Qəzzada sabitliyi qorumaq məqsədilə müxtəlif ölkələrin hərbçilərindən ibarət ola biləcək beynəlxalq sabitləşdirici qüvvələr məsələsini də müzakirə edəcəklər.
Yenidənqurma və hərbçilərin göndərilməsi ABŞ Prezidentinin sülh planının tərkib hissəsidir. Plan atəşkəsin təmin olunmasını, HƏMAS-ın silahsızlaşdırılmasını və keçid dövründə Qəzzanı idarə edəcək texnokrat hökumətin yaradılmasını nəzərdə tutur. Bu hökumətin fəaliyyətinin Sülh Şurasının rəhbərliyi altında həyata keçirilməsi planlaşdırılır.
