Böyük Britaniyada 2025-ci ilin aprelində vəfat edən amerikalı-avstraliyalı aktivist Virciniya Juffrenin “Heç kimə aid olmayan qız” (“No One’s Girl”) adlı xatirə kitabı nəşr olunur. DenMedia.az xəbər verir ki, kitabdan sitatları BBC yayıb.
Juffre dünyada məşhur olub, milyarder Ceffri Epşteyni və Britaniya şahzadəsi Endrünü azyaşlıların cinsi istismarında ittiham etdikdən sonra.
Şahzadə Endrü 2022-ci ildə Juffre ilə maliyyə razılaşması əldə edib və hər hansı hüquq pozuntusunu həmişə inkar edib.
Epşteyn isə 2008-ci ildə 18 yaşdan kiçik şəxsi fahişəliyə cəlb etdiyinə görə Floridada məhkum olunmuşdu.
Onun sevgilisi Gislain Maksvell hazırda insan alveri və cinsi istismar ittihamı ilə 20 il həbs cəzası çəkir.
Xatirələrdə Juffre iddia edir ki, şahzadə Endrü ilə üç dəfə cinsi əlaqədə olub; onlardan birində Epşteyn və səkkizə yaxın başqa qız – o cümlədən azyaşlılar – iştirak ediblər.
Onun sözlərinə görə, Epşteynin sadomazoxist meylləri səbəbindən həm ondan, həm də Endrüdən qorxub.
“O, mənə elə ağrı verirdi ki, huşumu itirmək üçün dua edirdim,” – yazır Juffre.
O, şahzadə Endrü ilə ilk dəfə 2001-ci ilin martında tanış olduğunu bildirir. Həmin gün Maksvell onu oyadaraq “Zoluşka kimi gözəl bir şahzadə ilə tanış olacağını” deyib, daha sonra isə “şahzadə üçün də Ceffri üçün etdiyini et” sözlərini söyləyib.
“O, kifayət qədər mehriban idi, amma çox təkəbbürlü. Elə bil mənimlə yatmağın doğuşdan haqqı idi,” – yazır Juffre.
Aktivist qeyd edir ki, Epşteynin ətrafındakı qızlardan “uşaq kimi görünmələri” tələb olunurdu və onun qidalanma pozğunluğu belə təşviq edilirdi.
“İllərlə məni bir çox varlı və nüfuzlu adamlara ‘icarəyə’ verirdilər. Mənə qarşı zorakılıq, təhqir, hətta döymə və boğma hallarına yol verilirdi. Mən inanırdım ki, ömrümün sonuna qədər cinsi qul olaraq qalacam,” – deyə yazır Juffre.
19 oktyabrda London polisi bəyan edib ki, şahzadə Endrünün Juffre haqqında şəxsi məlumat əldə etməyə çalışdığına dair mediada çıxan xəbərləri “aktiv şəkildə” araşdırır.
Saray mənbəsi BBC-yə bildirib ki, Endrünün şahzadə titulundan məhrum edilməsi planlaşdırılmır, lakin o, York hersoqu titulundan könüllü imtina etməyi düşünür.
Xatırladaq ki, Epşteyn 2002–2005-ci illərdə Nyu-Yorkdakı evində və özəl adasında azyaşlı qızların ziyarətini təşkil etdiyinə görə ittiham olunmuşdu; istintaq dəvət edilənlər arasında ən gənc qızın 14 yaşında olduğunu müəyyən etmişdi.
2019-cu ilin avqustunda maliyyəçi həbsxanada huşsuz vəziyyətdə tapılıb və xilas edilə bilməyib.
