Bakıda motosikletçilərin düşdüyü dəhşətli qəzanın - Videosu

DİN-in Nəqliyyatı İntellektual İdarəetmə Mərkəzi paytaxt ərazisində motosikletlərin iştirakı ilə baş vermiş bəzi qəzaların görüntülərini yayıb.

“Den.az” xəbər verir ki, hadisələrə sürücülərin işıqforun qırmızı işığında hərəkət etməsi səbəb olub.

Mərkəzin sektor müdiri Ömər Xıdırov bildirib ki, Bakıda müxtəlif vaxtlarda baş verən bu qəzalara diqqət yetirdikdə istər minik avtomobilinin, istərsə də motosikletin sürücüsünün işıqforun qadağanedici siqnalını heçə sayması və yolu gəldiyi sürətlə keçməsi məlum olur: “İşıqforun qırımızı işığından keçməyin təhlükəli olması, bunun acı nəticələri ilə bağlı bir neçə dəfə videoməlumat paylaşmışıq. Ancaq, təəssüflər olsun ki, bəzi sürücülər nədənsə işıqforların qırmızı işığından keçməyin nə qədər təhlükəli olduğunun fərqində deyillər. NİİM diqqətə çatdırır ki, işıqforun qırmızı işığından keçmək ağır fəsadlara səbəb ola bilər. Buna görə də işıqfora yaxınlaşdıqda sürəti azaltmalı, lazım olan təhlükəsizlik tədbirlərini görməli və siqnalların tələblərinə riayət olunmalıdır”.


Qeyd edək ki, görüntülərdəki birinci hadisə ötən ilin noyabrın 18-i baş verib.

Hadisə zamanı iki motosiklet yolayrıcını keçərkən “Changan” və “Toyota” markalı avtomobillərə çırpılıb.

Qəza nəticəsində motosikletlərin sürücüləri və sərnişini ağır xəsarət alıblar. Bunlar 2002-ci il təvəllüdlü Zeynalabdin Elçin oğlu Tağıyev, 1989-cu il təvəllüdlü Sehran Əli oğlu Məhərrəmov və 1991-ci il təvəllüdlü Vüsal Kamil Allahverdiyev oğludur.

Yaralılar Kliniki Tibbi Mərkəzə yerləşdiriliblər. Həkimlərin verdiyi məlumata görə, üç yaralı xəstəxanaya yerləşdirilib, ikisinin ayaq sümükləri sınıb. Onlar cərrahi əməliyyat edildikdən sonra xəstəxananın Reanimasiya şöbəsinə yerləşdirilib.

İkinci hadisə isə bu il fevralın 28-i qeydə alınıb.