Micron Technology istehlakçı seqmentindən strateji şəkildə çıxacağını və Crucial brendi altında istehsal olunan bütün məhsulları — operativ yaddaş və SSD-lər də daxil olmaqla — bazardan geri çəkəcəyini açıqlayıb. Şirkət bildirib ki, qlobal pərakəndə satışlar 2026-cı ilin fevralına qədər tam dayandırılacaq və bundan sonra əsas fokus süni intellekt sahəsinə yönləndiriləcək.
Micron-un məlumatına görə, bu qərar məlumat mərkəzləri üçün yaddaş və saxlama sistemlərinə tələbatın sürətli artması ilə bağlıdır. Süni intellekt əsaslı infrastrukturun genişlənməsi yüksək performanslı komponentlərə rekord səviyyədə ehtiyac yaradıb və şirkət resursları korporativ müştərilərə yönəltmək qərarına gəlib.
Şirkət vurğulayıb ki, 29 il ərzində Crucial brendi istehlakçı yaddaşı bazarında keyfiyyət və texnoloji etibarlılığın simvoluna çevrilib. Micron milyonlarla istifadəçiyə və tərəfdaşlara uzun illər göstərdikləri etimada görə təşəkkür edib.
Korporasiya qeyd edir ki, istehlakçı seqmentinin bağlanması məhsul portfelinin uzunmüddətli transformasiyasının bir hissəsidir və məqsəd yüksək performanslı yaddaş və korporativ saxlama həlləri sahəsində mövqeləri gücləndirməkdir. Micron brendi altında korporativ bazar üçün istehsal davam edəcək.
Kadr itkilərini minimuma endirmək üçün şirkət əməkdaşlarına Micron daxilində mövcud vakansiyalara keçid imkanı təqdim edəcək.
