Xırdalan şəhərində yerləşən çoxmənzilli yaşayış binalarından birinin zirzəmisində yanğın hadisəsi baş verib.
"Denmedia.az" Memur.az-a istinadla xəbər verir ki, hadisə qısa müddətdə ətrafda yaşayan sakinlər arasında ciddi narahatlıq və təşvişə səbəb olub.
Məlumata görə, yanğın binanın zirzəmi hissəsində qeydə alınıb. Hadisə zamanı alovun və tüstünün sürətlə yayılması bina sakinlərinin təhlükəsizliyi ilə bağlı ciddi suallar yaradıb. Sakinlər bildirirlər ki, belə halların qarşısının alınması üçün zirzəmilərin texniki vəziyyətinə mütəmadi nəzarət olunmalı, təhlükəsizlik qaydalarına ciddi riayət edilməlidir.
Ərazidə yaşayan vətəndaşlar uzun müddətdir zirzəmilərdə səliqəsizliyin və nəzarətsizliyin hökm sürdüyünü, müxtəlif yanğın risklərinin mövcud olduğunu qeyd edirlər. Onların sözlərinə görə, bu cür hadisələr gözlənilməz deyil və vaxtında görülməyən tədbirlər daha ağır nəticələrə səbəb ola bilər.
Yanğının başvermə səbəbləri və mümkün fəsadları ilə bağlı araşdırmaların aparıldığı gözlənilir.
Qeyd edək ki, mütəxəssislər yaşayış binalarının zirzəmilərində elektrik xətlərinin vəziyyətinə, yanğın təhlükəsizliyi qaydalarına və ümumi texniki baxışa xüsusi diqqət yetirilməsinin vacibliyini vurğulayırlar.
