“Sevindiyimdən gecə yata bilmirdim” – “Qarabağ”ın qapıçısı

“Qarabağ”ın futbolçusu Sadiq Məmmədzadə “Gənclər Günü” münasibəti ilə Peşəkar Futbol Liqasının mətbuat xidmətinə müsahibə verib.

"Den.az" xəbər verir ki, 19 yaşlı qolkiper əvvəlcə “Qarabağ”da ilk dəfə rəsmi oyuna çıxmasından danışıb:

“Ən böyük arzularımdan biri məhz “Qarabağ”da oyuna çıxmaq idi. “Kəpəz”lə matçdan əvvəl klubdan mənə dedilər ki, əsas heyətdə oyuna çıxacaqsan. Buna çox sevindim. Sevincimdən gecə yata bilmirdim. Çünki “Qarabağ” kimi böyük bir klubda oyuna çıxmaq ən böyük arzum idi. Meydana çıxanda həyəcan var idi. Amma bu, yaxşı həyəcan idi”.

Gənc qapıçı futbola başlayarkən meydan oyunçusu olduğunu bildirib: “O vaxt “Neftçi” İdman Klubunda oynayırdım. Bir dəfə qapıçımız yox idi və mən qapıya keçmək istədim. Bundan sonra qapıdakı oyunumu bəyəndilər və davamı gəldi”.

Məmmədzadə “Fənərbağça”da çıxış etmək aruzunda olduğunu da qeyd edib: “Mən özüm də gəncəm. Özümdən yaşda kiçik qapıçılara da demək istəyirəm ki, hər zaman qarşılarına bir məqsəd qoysunlar və onun ardınca getsinlər. İstəyərəm ki, belə qapıçılardan olum. Həm Azərbaycanda, həm də Avropada. Məqsədlərimdən biri Avropada oynamaqdır. Mən “Fənərbağça” fanatıyam. Ən böyük arzularımdan biri də odur ki, “Fənərbağça”da çıxış edim”.