Oksford Universitetinin alimləri müəyyən ediblər ki, arıqlama inyeksiyaları kursunu dayandıran insanlar itirdikləri çəkinin demək olar hamısını iki ildən az müddətdə geri qaytarır. Bu nəticə 9341 nəfərin iştirak etdiyi 37 tədqiqatın təhlili əsasında əldə olunub. Araşdırmada GLP-1 agonistləri kimi tanınan arıqlama preparatları öyrənilib. Bu barədə The Guardian yazır.
Tədqiqatın müəlliflərindən biri, "University of Oxford"un alimi Sam West bildirib ki, bu dərmanlar piylənmənin müalicəsinə yanaşmanı dəyişib və əhəmiyyətli çəki itkisinə imkan verir. Lakin onun sözlərinə görə, müalicə dayandırıldıqdan sonra insanlar adətən çəkini çox sürətlə yenidən yığır — hətta davranış proqramları ilə müqayisədə daha tez.
Araşdırmaya əsasən, iştirakçılar müalicə dövründə orta hesabla 8,3 kq arıqlayıb. Kurs bitdikdən sonra isə ayda təxminən 0,4 kq çəki alaraq 1,7 il ərzində əvvəlki çəkiyə qayıdıblar. Alimlər qeyd edirlər ki, dərmanlardan sonra çəki artımının sürəti pəhriz və fiziki aktivliklə müqayisədə təxminən dörd dəfə yüksəkdir. Bundan əlavə, ürək-metabolik göstəricilərdə əldə edilən yaxşılaşmalar da 1,4 ildən sonra ilkin səviyyəyə qayıdıb.
The Guardian vurğulayır ki, arıqlama inyeksiyaları artıq çəki və diabet riskinin azaldılması üçün vacib vasitə olaraq qalır. Bununla belə, mütəxəssislər müalicə bitdikdən sonra kompleks yanaşmanın və davamlı dəstəyin zəruri olduğunu xüsusi qeyd edirlər.
