Evdən çıxmazdan əvvəl qəhvə içmək insanların fərqinə varmadan gün ərzində təxminən 1000–1050 addım daha çox yeriməsinə kömək edə bilər.
Bu nəticə Kaliforniya Universitetinin San-Fransisko kampusunun (UCSF) kardioloqları tərəfindən aparılan araşdırmada əldə olunub.
Tədqiqat zamanı yüzlərlə iştirakçının bir neçə həftə ərzində fiziki aktivliyi, ürək ritmi və yuxu göstəriciləri izlənilib. Könüllülər müəyyən günlərdə qəhvə içib, digər günlərdə isə kofeindən tamamilə imtina ediblər.
Fitnes-trekerlərin məlumatları göstərib ki, iştirakçılar qəhvə içdikləri günlərdə orta hesabla 1000–1050 addım daha çox atıblar. Onlar daha çox pilləkənlərdən istifadə edib, qısa məsafələri piyada getməyə üstünlük veriblər və gün ərzində oturaq vəziyyətdə daha az vaxt keçiriblər.
UCSF-in tibb professoru və kardioloqu Qreqori Markus bildirib ki, araşdırma kofeinin insanların gündəlik davranışına nəzərəçarpacaq təsir göstərdiyini göstərir.
“Qəhvə içilən günlərdə insanlar əhəmiyyətli dərəcədə daha fəal olurdular. Bu aktivlik təbii şəkildə artırdı: onlar liftdən çox pilləkəni seçir və daha çox piyada gedirdilər”, – mütəxəssis qeyd edib.
Onun sözlərinə görə, gündə əlavə min addım atmaq uzunmüddətli perspektivdə sağlamlıq üçün faydalı ola bilər. Bununla belə, bu göstərici qəhvənin özü ilə bağlı birbaşa səbəb-nəticə kimi qiymətləndirilməməlidir.
Mütəxəssislər qəhvəni planlaşdırılan gəzintidən və ya alış-verişə çıxmazdan 20–30 dəqiqə əvvəl içməyi məsləhət görürlər. Kofein diqqəti və hərəkət həvəsini artıra, yorğunluq hissini azalda bilər.
Araşdırmada qəhvənin mənfi tərəfi də qeydə alınıb: kofein ümumi yuxu müddətini təxminən 30 dəqiqə azalda bilər. Buna görə də qəhvənin əsasən günün birinci yarısında içilməsi tövsiyə olunur.
