40–50 yaşlı qadınların gecənin ortasında, xüsusilə saat 03:00–04:00 aralığında tez-tez oyanmasının səbəblərindən biri hormonal dəyişikliklər ola bilər.
Somnoloq və psixoloq Zoi Gotts bildirib ki, perimenopauza və menopauza dövründə estrogen və progesteron səviyyələrinin dəyişməsi yuxunun keyfiyyətinə təsir edə bilər.
Bu dövrdə qadınlar gecə tərləmələri, bədən temperaturunda dəyişikliklər və ətraf qıcıqlandırıcılara qarşı daha yüksək həssaslıq səbəbindən gecə bir neçə dəfə oyana bilərlər.
Mütəxəssis vurğulayıb ki, yuxu problemlərini sadəcə yaşlanmanın qaçılmaz nəticəsi kimi qəbul etmək düzgün deyil. Yuxu pozuntuları davamlı hal alarsa, səbəbin müəyyənləşdirilməsi üçün həkimə müraciət etmək məsləhətdir.
Gecə oyandıqdan sonra yenidən yuxuya getmək üçün isə saata baxmamaq tövsiyə olunur. Saatı izləmək insanda “artıq gecdir” hissi yaradaraq narahatlığı artıra və yenidən yuxuya getməyi çətinləşdirə bilər.
Əgər tamamilə oyandığınızı hiss edirsinizsə, qısa müddət yataqdan qalxmaq, zəif işıqda sakit və rahatladıcı fəaliyyətlə məşğul olmaq, yuxu hissi geri qayıtdıqda isə yenidən yatağa uzanmaq daha faydalı ola bilər.
