Xurmanın ağızbüzüşdürən dadından xilas olmaq üçün onu dondurmaq və ya bir neçə gün alma, yaxud bananla birlikdə saxlamaq olar.
Bu barədə Moskva Politexnik Universitetinin “KimBiotex” kafedrasının müdiri, kənd təsərrüfatı elmləri doktoru Nina Myasişeva “Gazeta.Ru” nəşrinə açıqlamasında bildirib.
Mütəxəssisin sözlərinə görə, xurmanın ağızbüzüşdürən dadına səbəb bitkini zərərvericilərdən qoruyan tanin adlı maddələrdir. Bu maddələr xüsusilə tam yetişməmiş meyvələrdə çox olur.
Taninlər ağız boşluğunun selikli qişasındakı zülallarla qarşılıqlı təsirə girərək quruluq və büzüşmə hissi yaradır. Meyvə yetişdikcə həll olan taninlərin bir hissəsi həll olmayan formaya keçir və ağızbüzüşdürən dad azalır.
Alimin sözlərinə görə, xurmanı mənfi 18 dərəcə və daha aşağı temperaturda dondurmaq onun ağızbüzüşdürən dadını azaltmağa kömək edə bilər. Dondurma zamanı yaranan buz kristalları meyvənin hüceyrə quruluşunu zədələyir və taninlərlə bağlı dəyişikliklərə səbəb olur.
Digər üsul isə xurmanı bir neçə gün alma və ya bananla eyni torbada saxlamaqdır. Bu meyvələrin ifraz etdiyi etilen qazı xurmanın təbii yetişməsini sürətləndirir və ağızbüzüşdürən dadın azalmasına kömək edir.
Mütəxəssis bildirib ki, təbii yetişmə üsulu dondurmadan daha münasibdir. Çünki bu zaman xurma öz bərkliyini daha yaxşı saxlayır.
Xurmanı 10–12 saat suda saxlamaq da ağızbüzüşdürən dadı azalda bilər. Lakin bu üsulda suyun temperaturuna diqqət yetirilməlidir. Əks halda meyvə həddindən artıq yumşalaraq jeleyəbənzər hala düşə bilər.
Alim ən yaxşı seçimlərdən biri kimi “Korolyok” xurma sortunu göstərib. Onun sözlərinə görə, bu sort hətta bərk olduqda belə, adətən ağızbüzüşdürən dada malik olmur.
