“Qərbi Azərbaycana qayıdış: Tarixi torpaqlarda maddi-mədəni irsimiz” kitabı təqdim olundu

Sosial Tədqiqatlar Mərkəzinin (STM) təşkilatçılığı ilə “Qərbi Azərbaycana qayıdış: Tarixi torpaqlarda maddi-mədəni irsimiz” kitabının təqdimatı olub.

Den.az xəbər verir ki, kitabın təqdsimatında çıxış edən Azərbaycan Respublikasının Mədəniyyət nazirinin müavini Səadət Yusifova bildirib ki, hər bir ölkənin maddi-mədəni irsi onun tarixidir:

“Keçmiş olmasa, gələcək olmaz. Daim keçmişimizi qorumalıyıq. Çox təəssüflər olsun ki, müasir Ermənistan daim ölkəmizin maddi-mənəvi irsini məhv etməyə çalışır. Qərbi Azərbaycanda Azərbaycan tarixinə məxsus 25 min abidə qeydə alınıb. Onlardan İslam mədəniyyətinə aid olan bir neçəsi Azərbaycanın yox, başqa ölkənin abidəsi kimi qeydə alınıb. Qeyd etmək lazımdır ki, Qərbi Azərbaycanda əsasən İslam mədəniyyətinə xas olan abidələr var. Müasir Ermənistan daim soyqırımı və dəhşətlətr törədib. Bunu dünyaya çatdırmalıyıq”.
Tarix üzrə fəlsəfə doktoru, Azərbaycan Respublikasının Dini Qurumlarla İş üzrə Dövlət Komitəsinin sədri Mübariz Qurbanlı qeyd edib ki, erməni tarixi miflərdən, uydurmalardan ibarətdir:

“Biz ermənilərlə təkcə cəbhədə savaşmırıq. Bütün sahələr üzrə savaşırıq. Daim işğaıçılıq siyasəti yürüdən müasir Ermənistan Azərbaycanca yazılan qəbri də göstərib deyir ki, bizimdir. Nə qədər yalan olduğu göz qabağındadır. Hələ ki, biz o torpaqlardan uzağıq, amma qayıdacağıq. Bu qədər uzaq olmağımıza baxmayaraq nə qədər tarixini bilirik. Hələ ora getsək, nələr öyrənərik. Erməni xalqı xaincəsinə bütün abidələri, şəhərləri məhv edir. Bir gün təqvimimizə Qərbi Azərbaycana qayıdış günü də salınacaq”.

Sosial Tədqiqatlar Mərkəzinin İdarə Heyətinin sədri Zahid Oruc bildirib ki, son iki yüz ildə fərdi və milli sərvətlərimiz ən azı 7 dəfə dağıdılıb:
“Regionda son 30 ildə azərbaycanlılar ermənilərdən iqtisadi baxımından daha varlı və nüfuzludur. Erməni diasporu ən zəngin kapitalla Rusiyada 1-ci, Argentinada 2-cidir. Lakin Azərbaycan dövləti heç zaman indiki qədər Ermənistandan güclü olmayıb. Zəfərə gedən 27 illik uzun yoldan fərqli olaraq, İrəvana, Göyçə mahalına, Zəngəzura qayıdış qısa vaxtda mümkün ola bilər”.

Sosial Tədqiqatlar Mərkəzinin sektor müdiri, Qərbi Azərbaycan İcmasının Ziyalılar Şurasının üzvü Əfqan Vəliyev vurğulayıb ki, müxtəlif dövrlərdə ermənilər Qərbi Azərbaycanda vəhşiliklər törədiblər:

“Ermənilər gəldiyi ilk gündən dağıdıcılıq işləri ilə məşğuldurlar. Onlar təkcə terroru insanlara qarşı etmirlər. Həm də abidələrə, maddi-mənəvi irsimizə qarşı da edirlər.

Qərbi Azərbaycanın incə, zərif maddi-mənəvi irsləri Fransaya aparılıb. Daim məlumatlar axtarırıq. İnanırıq ki, kitabın digər cildlərində Qərbi Azərbaycanı daha yaxından görüb, yazacağıq”.