"Əsəd rejimi süqut etdi, üsyançılar Dəməşqi ələ keçirdi" - BBC

"Bu gecə Bəşər Əsədin təyyarəsi havaya qalxıb, sonra radarlardan itib, təyyarənin raket atəşinə tutulması barədə məlumatlar yayılıb..."
 
Bazar günü, dekabrın 8-nə keçən gecə silahlı müxalifət dəstələri Suriyanın paytaxtı Dəməşqi ələ keçirib.
 
Den.az xəbər verir ki, bu barədə "bbc.com" nəşri məlumat yayıb.
 
Nəşr öz mənbələrinə istinadən yazır ki, "hərbi nöqteyi-nəzərdən Dəməşq ələ keçirilib". Suriya Müdafiə Nazirliyi hərbi qulluqçulara rejimin süqut etdiyini elan edib.
 
Səhər saatlarında "Həyat Təhrir əş-Şam" qüvvələri və silahlı müxalifət dəstələri ilk dəfə olaraq televiziya ilə müraciətində bu barədə elan edib. "Dəməşq Bəşər Əsəddən azad edilib. Bütün dünyada olan suriyalı qaçqınlara deyirik: azad Suriya sizi gözləyir", - onlar bəyan edib.
 
Dəməşq boyunca Əsəd ailəsinin portretləri çıxarılır, onların heykəlləri uçurulur. İnsanlar meydanlara çıxaraq "Azadlıq!" və "Allahu-Əkbər!" şüarları səsləndirir.
 
Suriyanın hazırkı baş naziri Məhəmməd Razi əl-Cəlali bəyan edib ki, ölkəni tərk etmək niyyətində deyil və "bundan sonra da dövlət işlərinin idarə edilməsinə dəstək verməyə" hazırdır.
 
"Biz xalqın seçdiyi istənilən rəhbərliklə əməkdaşlıq etməyə hazırıq. Biz dövlətini qoruyub saxlamaq istəyən və Suriyanın bütün suriyalılara məxsus olduğuna inanan hər bir vətəndaşına əlimizi uzadırıq".
 
O, Səudiuyyə Ərəbistanının "Əl-Ərəbiyyə" telekanalına məlumat verib ki, üsyançıların komandiri Əbu Məhəmməd əl-Culani ilə təmasda olub və "cari vəziyyətin idarə edilməsi məsələlərini" müzakirə edib.
 
Sosial şəbəkələrdə əl-Cəlalinin silahlı yaraqlıların müşayiəti ilə evindən çıxdığını əks etdirən video yayılıb. Qeyd edilir ki, o, hakimiyyəti silahlı müxalifətə ötürmək üçün otelə yollanır.
 
Bu gecə Bəşər Əsədin təyyarəsi havaya qalxıb, sonra radarlardan itib. Təyyarənin raket atəşinə tutulması barədə məlumatlar yayılıb. Şahidlər partlayış səsinin eşidildiyini deyir. Bu məlumat yoxlanılır.
 
İnsan haqları üzrə Suriya Observatoriyasının rəhbəri məlumat verib ki, onun mənbələrinə görə, Bəşər Əsəd Dəməşqdən hələ axşam saat 9-da özəl təyyarə ilə uçmalı olub.
 
Lakin onun kiçik qardaşı, ölkədə nüfuzuna görə ikinci şəxs olan Respubıika Qvardiyasının komandanı Mahir Əsəd uçuşdan imtina edib və paytaxtda binaların damında snayperləri yerləşdirməyi əmr edib.
 
Səhər saatlarında İsrail Müdafiə Ordusunun mətbuat xidməti baş verənlər fonunda və üsyançıların bufer zonaya daxil olması ehtimalı nəzərə alınaraq Suriya səhəddində əlavə bölmələrin yerləşdirilməsi barədə məlumat verib. Ordu bəyan edib ki, İsrail Suriyada baş verənlərə müdaxilə etmir.