“Meteor” raketləri Türkiyəyə satılacaq? - Lekornu açıqladı

Fransanın müdafiə naziri Sebastyan Lekornu parlamentin Müdafiə Komissiyasının iclasında Türkiyəyə mümkün “Meteor” raketlərinin satışı məsələsinə toxunub.

Den.az xəbər verir ki, bu barədə yerli mətbuat məlumat yayıb.

Lekornu İngiltərə ilə Türkiyə arasında “Meteor” raketlərinin Türkiyəyə satışı ilə bağlı danışıqlarda Fransanın hansı mövqe tutacağı sualına “Böyük Britaniyanın silah ixracına nəzarətimiz yoxdur", - deyə cavab verib.

O, Türkiyəyə “Eurofighters” satan tərəfin Fransa olmadığı üçün ölkəsinin bu məsələdə heç bir rolunun olmadığını bildirib.
“Düşünürəm ki, bu məsələdə diplomatiya və inandırmaqdan, xüsusən də hər kəsin bir-biri ilə danışması üçün bir yol tapmaqdan başqa çarəmiz yoxdur”, - deyə o qeyd edib.

Həmçinin Lekornu həmkarı ilə bu məsələləri müzakirə etmək üçün yaxın günlərdə Afinaya səfər edəcəyini də vurğulayıb.

Qeyd edək ki, Yunanıstan mətbuatında “Meteor” raketlərinin Türkiyəyə satışının qarşısını almaq üçün fevralın 11-də Parisdə Fransa prezidenti Emmanuel Makronla görüşən Yunanıstanın baş naziri Kiriakos Mitsotakisin bu məsələ ilə bağlı rədd cavabı aldığı bildirilib.

Günəş Fərəh
Den.az