Netanyahu tənqid hədəfində: müharibə siyasəti yenidən müzakirədə

Netanyahu’nun, cəmiyyətdə mövcud olan yox olma qorxusunu siyasi məqsədlər üçün istifadə edərək müharibə siyasətinə haqq qazandırdığı ilə bağlı müzakirələr yenidən güclənib.

Bu barədə Haaretz qəzetində yayımlanan analizdə qeyd olunub.

Materialda vurğulanır ki, əsas problem yalnız liderlik deyil, “müharibəni yeganə çıxış yolu kimi təqdim edən düşüncə tərzi”dir. İsrail cəmiyyətində uzun müddətdir hökm sürən təhlükəsizlik narahatlığı insanların özlərini daimi varlıq təhdidi altında hiss etməsinə səbəb olur.

Bu yanaşmanın nəticəsində hərbi gücün qaçılmaz həll kimi qəbul edildiyi bildirilir. Analizə görə, ölkədə geniş yayılmış düşüncə “tam güc tətbiq edildikdə daha çox nəticə əldə etmək olar” inancına əsaslanır.

Rəy sorğularında isə İranla əldə olunan atəşkəsə narazılığın geniş yayıldığı qeyd olunur. Hətta bir çox israillinin şəxsi təhlükəsizlik riskinə baxmayaraq, İrana qarşı əməliyyatların davam etdirilməsini dəstəklədiyi bildirilir.

Bu mövqenin arxasında isə “düşmən tam zərərsizləşdirilmədən təhlükəsizlik mümkün deyil” düşüncəsinin dayandığı vurğulanır.

Analizdə diqqət çəkən digər məqam isə müxalifətin mövqeyidir. Qeyd olunur ki, Netanyahu müxtəlif istiqamətlərdə yeni münaqişələr başlada bilir, müxalifət liderləri isə əsasən seçki gündəminə fokuslanaraq müharibə siyasətini açıq şəkildə tənqid etməkdən çəkinirlər.

Nəticə olaraq vurğulanır ki, İsraildə hər bir münaqişə “qaçılmaz zərurət” kimi təqdim olunur və bu artıq cəmiyyətdə qəbul olunmuş bir modelə çevrilib. Əsas riskin isə tək bir lider deyil, bu dövri müharibə düşüncəsi olduğu qeyd edilir.

DenMedia.az