ABŞ Məxfi Xidmətinin üç əməkdaşı, o cümlədən qurumun kommunikasiya rəhbəri Anthony Guglielmi mümkün xidməti pozuntularla bağlı aparılan araşdırma fonunda müvəqqəti olaraq vəzifələrindən uzaqlaşdırılıb.
CNN-in məlumatına görə, hər üç əməkdaşın məxfi məlumatlara çıxışı və iş cihazlarından istifadəsi dayandırılıb. Bu cür tədbirlər daxili araşdırmalar zamanı standart prosedur hesab olunur.
Məxfi Xidmət üç nəfərin inzibati məzuniyyətə göndərildiyini təsdiqləsə də, onların adlarını açıqlamayıb. Qurum yalnız söhbətin hüquq-mühafizə fəaliyyəti ilə birbaşa məşğul olmayan əməkdaşlardan getdiyini bildirib.
Araşdırmanı Məxfi Xidmətin Peşəkar Məsuliyyət İdarəsi aparır. Ehtimal edilən pozuntuların mahiyyəti isə hələlik ictimaiyyətə açıqlanmayıb.
