ABŞ-da andlılar məhkəməsi prezident Baydenin oğlunu irəli sürülən ittihamlar üzrə günahkar sayıb. 54 yaşlı Hanter Bayden silah alarkən yalan məlumat verməkdə ittiham olunur. H.Baydeni 25 ilə qədər həbs cəzası gözləyə bilər. Bu barədə yekun qərarı hakim verəcək.
Mövzunu "Den.az"a şərh edən politoloq Şahin Cəfərli bildirib ki, Tramp haqqında andlıların qərarından sonra o və tərəfdarları ölkəni ayağa qaldırmışdılar ki, qərar qanunsuzdur, saxtadır, məhkəmə korrupsiyalaşıb, Bayden və demokratlar məhkəmə sistemindən öz maraqları naminə silah kimi istifadə edirlər:
"Ən gülməlisi isə budur ki, öz rəqiblərini sadəcə olaraq, qətl yolu ilə zərərsizləşdirən Rusiya diktatorunun sözçüsü ABŞ məhkəməsinin qərarını "rəqibləri bütün qanuni və qanunsuz vasitələrlə siyasətdən uzaqlaşdırmaq" kimi qiymətləndirmişdi. İndi mövcud prezidentin oğlu haqqında verilən qərardan sonra Tramp və respublikaçılar boşluğa düşmüş oldular. Prezident Baydenin hadisəyə reaksiyası belə olub: "Bu işin nəticəsini qəbul edəcəyəm və Hanter apellyasiya verməyi dəyərləndirərkən məhkəmə prosesinə hörmət göstərməyə davam edəcəyəm". Gördüyümüz kimi, Bayden Trampdan fərqli olaraq, məsuliyyətli dövlət adamı kimi mövqe ortaya qoyub. Amma o ayrı məsələ ki, 82 yaşlı Baydenin prezidentliyə namizədlik israrını davam etdirməsi çox yanlışdır. Eləcə də çoxlu sayda cinayət əməlində təqsirləndirilən 78 yaşlı Trampın. Hər iki partiyada ali posta layiq kifayət qədər kadr var. Gerontokratiya təzahürləri ABŞ siyasətinin əsas probemlərindən biridir".
Günəş Fərəh
Den.az
