Ümumdünya Səhiyyə Təşkilatının baş direktoru Tedros Adhanom Ghebreyesus İspaniyanın baş naziri Pedro Sánchezin gəncləri sosial şəbəkələrin “zəhərli aləmi”ndən qorumaq təşəbbüsünü dəstəkləyib və platformalarda yaş məhdudiyyətlərinin tətbiqinə çağırıb.
“Platformalar uşaqların təhlükəsizliyini və sağlamlığını qoruyacaq şəkildə hazırlanmalı və fəaliyyət göstərməlidir”, — deyə Tedros Adhanom Ghebreyesus X sosial şəbəkəsində yazıb. Onun sözlərinə görə, bunun üçün digər tədbirlərlə yanaşı, “real yaş məhdudiyyətləri tətbiq olunmalıdır”.
ÜST rəhbəri bildirib ki, Pedro Sánchezin mövqeyi ilə razıdır və əlavə edib ki, “sosial şəbəkələrin tənzimlənməsi və hesabatlılığı böyük əhəmiyyət daşıyır”. Onun fikrincə, mövcud faktlar uşaqlara dəyən zərərin təkcə sosial şəbəkələrdən istifadə ilə deyil, həm də onların necə qurulması ilə bağlı olduğunu sübut edir.
Bu kontekstdə Tedros Adhanom Ghebreyesus sosial şəbəkələrin “zərərli və asılılıq yaradan dizaynı”na qarşı mübarizəyə çağırıb və onların “müstəqil nəzarətə cəlb edilməsinin” vacibliyini vurğulayıb.
